Takimi me banorët, MEI: Rivlerësim të dëmeve

MEI bën një rezyme të masave të marra,  që nga dhjetori i vitit të kaluar.

“Në datën 26 dhjetor 2016 është urdhëruar ndalimi i injektimit të ujit teknologjik nga Bankers Petrolium në zonën e Zharrëzës, ndalim që vazhdon dhe sot. Nga banorët u kërkua që ndalimi të bëhet përhershëm, çka u pranua dhe institucionet përkatëse do të marrin masat për ndalimin përfundimtar të injektimit të ujit teknologjik në zonë, njësoj siç e përcakton edhe raporti i grupit ndërministror të punës”, thotë ministria.

Paralelisht me këtë është bërë verifikimi paraprak i dëmeve, nga ku rezultojnë 502 shtëpi të dëmtuara, nga të cilat 44 të dëmtuara rëndë dhe 26 prej tyre të pabanueshme.

Një kërkesë e banorëve ka qenë rivlerësimi i dëmeve, që MEI thotë se do të nisë nga java e ardhshme.

“Banorët kërkuan që vlerësimi të mund të rikryhet në ato raste kur ka kontestime. Brenda javës së ardhshme do të ngrihet një grup me ekspertë teknikë për të rivlerësuar rastet e kontestuara nga banorët”, shtohet në deklaratën e shpërndarë nga Ministria e Energjitikës.

Është vendosur gjithashtu që nga Drejtoria e Emergjencave Civile dhe pushteti vendor të strehohen në banesa me qira banorët e 70 shtëpive të dëmtuara më rëndë deri në riparimin e tyre.

“Vazhdon procesi i vlerësimit të shkaqeve nga vijnë lëkundjet. Mbi bazën e të dhënave të regjistruara është përzgjedhur një listë ekspertësh të pavarur ndërkombëtar që do të kryejnë këtë analizim”, thotë MEI.

Top Channel