Fiks Fare: “Pallati vdekjes”, 8 familje rrezikojnë jetën

Megjithatë, në “pallatin e vdekjes” jetojnë ende 8 familje, të cilët rrezikojnë jetën. Shërbimi Gjeologjik Shqiptar e ka shpallur të pabanueshëm dhe ka rekomanduar largimin e banorëve nga kjo godinë. Po në vitin 2012, zyra e Urbanistikës në Bashkinë Poliçan e vlerësoi pallatin si të rrezikshëm për të jetuar. Por, përveç këtyre vlerësimeve, në këtë pallat jetojnë ende 8 familjet.

Emisioni “Fiks Fare” solli problemin e 8 familjeve të lagjes Pronovik në qytetin e Poliçanit. Gazetarët e Fiksit udhëtuan drejt këtij qyteti pas informacionit se banorët e një pallati në këtë qytet ishin në rrezik serioz për jetën. Pallati në të cilin jetojnë është shpallur i pabanueshëm që në viti 2012 nga shërbimi Gjeologjik Shqiptar.

Banorët e pallatit thanë për gazetarët e “Fiksit” se po rrezikojnë jetën duke jetuar ende aty, por kjo pasi ata nuk kanë ku të shkojnë. I janë drejtuar me shkresa zyrtare të gjitha institucioneve përgjegjëse që nga Ministria e Zhvillimit Urban, Ministria e Brendshme, Prefekti i Qarkut Berat e deri tek Kryeministri Edi Rama.

Nebi Çela është njëri prej banorëve të pallatit, i cili thotë se është ndjerë shumë i rrezikuar në këtë banesë, kësisoj është detyruar të marrë një banesë me qira. Ai pohon se të ardhurat e familjes së tij nuk i përballojnë dot të gjitha shpenzimet. “I largonim krevatët sa në një cep në një tjetër, se binte suvaja”, tregon gruaja e Nebiut.

Shumica e familjeve në pallat hapën dyert për Fiksin për të treguar shtëpitë e tyre, suvatë e rëna dhe frikën që i shoqëron gjithë kohës. Fundi i rrëfimit të secilit prej tyre ishte: “Ku të vemi?! Ku të mbytemi?!”.

Në katin e dytë jeton e vetme një 80 vjeçare, të cilës nga lëvizja e dyshemesë si rezultat i rrëshqitjes së tokës, asaj nuk i mbyllet asnjë derë në shtëpi. Ajo shpjegon se herë pas here merr usta për të suvatuar dhe për të zënë të plasariturat e mureve. “Unë jetoj e vetme të keqen nëna, as dyert s’më mbyllen edhe po të vdes duhet të heqin derën që të më nxjerrin”, tregon e moshuara.

Banorët prej vitesh u drejtojnë kërkesa të gjitha institucioneve, por akoma nuk kanë marrë asnjë zgjidhje. Në dosjen e tyre të kërkesave kishte edhe kthim përgjigje, ku të gjitha institucionet ia linin përgjegjësin Bashkisë Poliçan. Ndaj gazetarët e Fiksit ju drejtuan bashkisë për të marrë një përgjigje. Kryetari i saj , Adriatik Zotkaj, tha se ne nuk kemi mundësi për të ndërtuar një pallat të ri, e vetmja mundësi është të marrim shtëpi me qira për banorët. Ai thotë se ka kërkuar ndihmën e të gjitha ministrive për t’i ofruar fonde, por ato luajnë kukafshehti me banorët dhe ia hedhin fajin bashkisë. “Unë jam i gatshëm t’ju ofroj banorëve banesa me qera , koha filloi për zgjidhje, ne do t’i nxjerrim menjëherë banorët nga pallati”, thotë kryetari i bashkisë.

Gazetarët e “Fiksit” ju drejtuan prefekturës së Qarkut Berat. Prefekti tha: Unë në këtë moment do merrem personalisht me këtë çështje, pavarësisht se është e gjitha përgjegjësi e Bashkisë Poliçan.

Top Channel