Me armë në pistën e Rinasit! Vjedhje spektakolare në mes të ditës

Tre persona me armë e maska kaluan gjithë sistemet e sigurisë së Aeroportit Ndërkombëtar “Nënë Tereza” dhe hynë deri në pistën e avionëve. Pasi rrëmbyen disa thasë me para që do të transferoheshin jashtë me avionë, jane larguar sërish për të mos u kapur.

Ngjarja ndodhi në orën 14:45 të kësaj të enjte në kohën që në pistë ndodheshin disa avionë për t’u nisur. Sipas policisë, grabitësit kanë qenë të paktën tre persona dhe kanë prerë menteshat në një nga portat e rrethimit të jashtëm të aeroportit.

Më pas, ata kanë shkuar në këmbë deri pranë automjetit me para, ku nën kërcënimin e armëve rrëmbyen thasët dhe janë larguar sërish në këmbë nga e njëjta portë. Në rrugë i priste një automjet me të cilin janë larguar drejt Fushë-Prezës.

Policia nisi kërkimet nga ajri me helikopter dhe në një zonë të pyllëzuar gjeti një mjet tip Benz të djegur. Automjeti i përdorur për transportin e grabitësve rezulton të jetë i vjedhur që në muajin mars në qytetin e Pogradecit. Policia dyshon se grabitja është realizuar nga një grup i mirëorganizuar, të cilët kanë ndarë detyrat.

Reparti RENEA ndodhet në aksion në kërkim të grupit të grabitësve, ndërsa janë sekuestruar të gjitha regjistrimet e kamerave të sigurisë.

Ndërkohë, janë shoqëruar punonjësit e kompanisë private të sigurisë që transportonte paratë dhe ata të caktuar për ruajtjen e portave të jashtme të aeroportit.

Policia dyshon për të tjerë të përfshirë në ngjarje e rëndë. Në hetim bashkë me Prokurorinë e Krimeve të Rënda ajo që po kërkohet më së shumti është fakti nëse ka persona të brendshëm që mund të kenë ndihmuar grabitësit.

Policia ka gjetur disa prova në dyert e jashtme të aeroportit si edhe pret të tjera në disa pjesë të padjegura ende të automjetit që u përdorë prej tyre dhe ju vu zjarri.

Top Channel