BE kritika Serbisë

“Duam të tregojmë që ne do të shëtisim, nuk do të zhdukemi dhe do të kemi paradë 365 ditë të vitit dhe deri atëherë kur institucionet të mos e kuptojnë mesazhin dhe thelbin e asaj për të cilën ne flasim këtu”, deklaroi Maja Miçiç nga Nisma e të Rinjve për të Drejtat e Njeriut.

Qeveria e Serbisë, përkatësisht institucionet e sigurisë, ndaluan paradën e së shtunës, e cila solli shumë forca sigurie dhe pakënaqësi pasi ndalohet për herë të tretë.

Në procesin integrues Serbia duhet të respektojë të drejtat e njeriut, por kundër paradës ishin organizatat ekstremiste dhe Kisha. Një ditë pas vendimit, ministra të vendeve Perëndimore kritikuan Serbinë. Ndërkaq, Jellko Kacin, raportuesi i BE-së për Serbinë, tha se ky shtet nuk po kryen detyrën.

“Konsensusi është arritur kundër dhe jo pro paradës dhe promovimit të të drejtave të pakicave. Porosia që i është dërguar qeverive të vendeve të Bashkimit Evropian është se shteti serb nuk është duke kryer punën e saj”, deklaroi Kacin.

Parada kaloi pa probleme të shumta, ndonëse as policia nuk ishte njoftuar për një gjë të tillë. Krerët e shtetit thanë se mbajtja e paradës do të ishte e rrezikshme.

Top Channel