Irani ka njoftuar Agjencinë e OKB për Energjinë Bërthamore se planifikon
të avancojë centrifugat për pasurimin e uraniumit në impiantin e
Natanzit. Lajmin e bënë të ditur disa diplomatë iranianë.
Lëvizja do t’i mundësojë vendit islamik të rafinojë uraniumin në një shkallë më të shpejtë, duke rritur frikën e Perëndimit për synimet e vërteta të Teheranit.
Republika Islamike insiston se programi i saj bërthamor ka vetëm qëllime paqësore, por Shtetet e Bashkuara dhe aleatët druhen se ajo po përpiqet të prodhojë bombën bërthamore.
Plani iu paraqit ANEB-së përmes një letre dërguar më 23 janar. Në letrën në fjalë përmendet një model centrifuge, e quajtur IR2m, që mund të pasurojë uranium dy ose tre herë më shpejtë se pajisjet aktuale që përdor Teherani.
Nga ana e saj ANEB u dërgoi një letër shteteve anëtare për t’i informuar se Irani ka ndërmend t’i përdorë makinat e avancuara në impiantin e Natanzit, bën të ditur agjencia “Reuters”.
“Sekretariati i Agjencisë mori një letër nga Teherani, më datë 23 janar 2013, ku informonte se centrifuga të tipit IR2m do të përdoren në njësinë A-22 në impiantin e Natanzit”, ka njoftuar ANEB.
Impianti në fjalë, që ndodhet në qendër të Iranit, është pika e përplasjes mes vendit islamik dhe Këshillit të Sigurimit të Kombeve të Bashkuara.
Ndërkohë, ditën e enjte shefja e Politikës së Jashtme të BE, Catherine Ashton deklaroi se beson se negociatat për çështjen bërthamore do të rifillojnë së shpejti.
Top Channel