Federata Ndërkombëtare e Atletikës përjashtoi me katër vjet peshëngritësin shqiptar, Erkand Qerimaj, i cili rezultoi pozitiv në testin antidoping të zhvilluar në Europianin e Antalias, ku ai u shpall fitues për peshat 77 kilogram.
Ajo që bie në sy në listën e të pezulluarve është fakti se të gjithë ata që kanë rezultuar pozitiv për të njëjtën substancë si Qerimaj janë dënuar deri në dy vjet, ndërsa shkodrani ka marrë dyfishin e atij dënimi.
”Më erdhi shumë i habitshëm vendimi i Federatës Botërore për pezullimin 4-vjeçar. Kam ndërmend të çoj çështjen në Gjykatën e Arbitrazhit Sportiv në Lozanë, në Zvicër, ku do të kërkoj uljen e dënimit dhe mundësinë e përfaqësimit në Lojrat Olimpike. Duke parë të gjitha rastet e tjera që janë në gjykatën e KAS-it, të gjithë sportistët e tjetë të kapur me të njëjtën substancë, nuk e kalojnë një vit dënim”, deklaroi peshëngritësi Qerimaj.
Trajneri Zef Kovaçi, pasi ka marrë përsipër përgjegjësinë e tij, ka lëshuar akuza ndaj zyrtarëve të komisionit anti-doping në Shqipëri. “Në Shqipëri, asnjë institucion apo individ, që paguhen me dhjetëra veta për këtë punë, nuk na ka njoftuar që të kemi kujdes nga vitaminat. Kjo është përgjegjësi e jona, por është përgjegjësi edhe e shumë njerëzve që marrin rrogë për këtë punë. Nuk na ka ardhur një herë në jetën time një doktor në palestër të na thotë mirëmëngjes dhe mirëmbrëma, e jo më të kryejë detyrën e tij”, akuzoi Kovaçi.
Në uebsajtin e saj, Federatata Ndërkombëtare e Peshëngritjes ka publikuar lajmin për përjashtimin e Qerimajt, ndonëse aktualisht titulli nuk i është hequr ende zyrtartisht.
Paradokseve të shumta i shtohet edhe një tjetër nga sekretari i FSHP-së, Ilir Kraja: “Ka ardhur komisioni i antidopingut në Tiranë për të kontrolluar sportistët që do të marrin pjesë në Olimpiadë dhe në atë listë është edhe Erkandi. Pasi të përfundojë kjo konferencë, ai do të shkojë të kryejë analizat për dopingun. Duhet vlerësuar si një shenjë pozitive që ai lejohet të kryejë këto kontrolle si pjesëtar i skuadrës olimpike shqiptare”.
Top Channel
