Disa e përshëndesin aktin e heqjes së barrikadave, e disa janë të mërzitur përse edhe kjo krizë përfundoi.
Presidenti serb, Boris Tadic, ka thënë se nuk e di nëse kjo do të ndikojë në statusin e kandidatit për Serbinë në Bashkimin Evropian, por duhej dalë nga rrethi i dhunës. Ai ka thënë se me marrëveshjen Serbia ka realizuar pjesët kryesore të ideve tësaj.
Përfaqësuesit e partive politike serbe kanë shprehur qëndrime të kundërta lidhur me heqjen e barrikadave në veri të Kosovës.
Goran Bogdanovic, ministër për Kosovën ka thënë se, kjo është një shenjë e mirë dhe shihet përgjegjësia e serbëve atje. “Është mirë që ata dëgjuan porosinë tonë dhe në mënyrë të qetë i heqin ato”, ka thënë ministri.
Ministri i Mbrojtjes Dragan Shutanovac ka thënë se serbët kanë sjellë vendimin e vetëm të mundshëm në të mirë të stabilitetit që i mundëson Serbisë të gjejë zgjidhje.
Krahu nacionalist i demokratëve ka reaguar ndryshe. Nënkryetari i partisë së ish-kryeministrit Koshtunica, Sllobodan Samarxhic, thotë se barrikadat do të ulin tensionet, por nuk do të thotë që të gjitha do të hiqen.
Ndërsa Cedomir Jovanovic, i liberaldemokratëve, ka thënë se kjo është një lojë tjetër pasi vetëm KFOR-it do t’i mundësohet liria e lëvizjes dhe atë si rrjedhojë e një marrëveshjeje në veri, e jo në Bruksel.
Barrikadat në fshatin Jagenicë u hoqën pas marrëveshjes së arritur në Bruksel mes delegacionit serb dhe atij kosovar për menaxhimin e integruar të kufijve.
Top Channel
