‘Non grata’ në SHBA/ Bashkë me Tom Doshin, Adriatik Llallën, Vangjush Dakon edhe politikani rumun i PSD në pushtet

07/09/2019 11:21

Ish lideri i Partisë Socialdemokrate në pushtet në Rumani, Liviu Dragnea dhe dy fëmijët e tij nuk do të hyjnë dot në Shtetet e Bashkuara. Dragnea, njëri prej njerëzvë më të fuqishëm të vendit u shpall publikisht “persona non grata“ nga Sekretari Amerikan i Shtetit, Mike Pompeo për shkak të akuzave që e lidhin “me përfshirje në akte të rënda korrupsioni“.

Ligji amerikan e lejon që kreu i Departamentit të Shtetit t’i njoftojë në kanale publike ose private ndalime të tilla për zyrtarë të caktuar dhe familjet e tyre. Fakti që në këtë rast u preferua rruga publike e përcjelljes së njoftimit, konsiderohet një sinjal i fortë që dërgohet nga Ëashingtoni për zyrtarët e shënjëstruar, e të tjerë që janë nën vëzhgim.

Në lupën e DASH-it duket janë individë të veshur me pushtet e që konsiderohen si të përfshirë në afera të rënda korruptive në të gjithë rajonin e Ballkanit.

Tre vendime të forta mori Departamenti në rastin e Shqipërisë, duke shpallur non grata Tom Doshin, Adriatik Llallën dhe Vangjush Dakon, si dhe familjarët e tyre. Rasti i Dragneas dëshmon se fushata e verifikimit të aferave korruptive nga amerikanët është shtritrë në të gjithë rajonin.

Rumania është një prej vendeve më të korruptuara të Bashkimit Europian dhe PSD-ja është parë si kërcënim për pavarësinë e gjyqësorit nga BE, Departamenti amerikan i Shtetit dhe mijëra gjyqtarë rumunë që kur mori pushtetin në 2017-ten. Prokurorët atje arritën të shpallin fajtorë një sërë ligjvënësish, ministrash dhe kryetarësh komunash, përfshirë dhe vetë Dragnean. Por në muajin korrik, Gjykata Kushtetuese rumune mbështeti ankimimin e PSD që argumentonte se gjykimet paraprake për korrupsionin duhet të ishin dëgjuar nga kolegjet gjyqësore të Gjykatës së Lartë, të specializuar për rastet e ryshfetit. Kjo nënkupton se rastet e korrupsionit të cilat nuk janë finalizuar deri në janar mund të rigjykohen, por për një vendim të tillë nuk u dha ndonjë arsyetim i detajuar ligjor.

Top Channel