Akuzohet për spiunazh në favor të Rusisë dhe Iranit, arrestohet punonjësi i ambasadës amerikane në Oslo 22/11 22:38
Një shpërthim pranë një stacioni autobusësh në Manhattan ka vënë menjëherë në lëvizje policinë njujorkeze, që evakuoi edhe 3 linja metroje.
Raportet në shtypin e huaj tregojnë se, në vendngjarje është gjetur një bombë artizanale, e sipas CNN-it, një person është arrestuar tashmë.
Disa media, ndërkohë, thonë se i ndaluari kishte një lloj mekanizmi me tela në trup, të cilin e mbulonte me xhup, por autoritetet amerikane nuk nxitojnë ende ta përshkruajnë incidentin si një akt me sfond terrorist.
CNN pretendon se nënkalimi nuk duket të ketë qenë shënjestra e të prangosurit. Bomba, sipas gjigantit mediatik amerikan, mund të ketë shpërthyer para kohe, duke i shkaktuar lëndime të rënda atij vet.
Nuk dihet ende nëse ka të plagosur të tjerë, por një sërë autoambulancash mbërritën në vendngjarje, ku policia vendosi menjëherë një perimetër sigurie.
Shtëpia e Bardhë tha se presidenti Donald Trump u informua mbi ngjarjen. Shpërthimi ndodhi në një kalim të nëndheshëm të “Port Authority”, stacioni qendror i autobusëve në Manhattan, përmes të cilit kalojnë çdo ditë me mijëra vetë.
Incidenti vjen vetëm një javë pasi presidenti Trump ngjalli polemika të mëdha e dhunë në Lindjen e Mesme, me vendimin e papritur për të njohur zyrtarisht Jeruzalemin si kryeqytetin e Izraelit. Më 31 tetor, Nju Jorku u godit nga një sulm terrorist, përgjegjësinë e të cilit e mori më pas Shteti Islamik. Në atë rast, një person u përplas me kamion mbi një grup njerëzish duke shkaktuar 8 viktima.
Top Channel
