Rama: Skemë të re për shëndetësinë

“Sistemi aktual i shëndetësisë ka falimentuar. Sistemi i kontributeve nuk është i përshtatshëm për vendin, në kushtet aktuale ekonomike e sociale. Sistemi i kontributeve arrin të kompensojë vetëm 7% të shpenzimeve për shëndetësinë”, ka deklaruar Rama.

Duke nënvizuar se, shumica e shqiptarëve e marrin kujdesin shëndetësor me lekë në dorë, Rama ka vlerësuar se rruga që ofron opozita ndryshon rrënjësisht nga ajo e qeverisë.

“Për qeverinë shëndetësia është mall që duhet të blihet, ndërse për ne ajo është një e mirë publike, që duhet të financohet. Janë dy rrugë tërësisht të ndryshme që njerëzit duhet të zgjedhin për të ardhmen. Njëra rrugë thotë: Po nuk pate lekë mos u sëmur; dhe tjetra thotë: Ne kujdesemi edhe për ata që s’kanë lekë”, ka thënë Rama.

“Skema e financimit të mos bazohet tek sigurimi, por tek parimi që shëndeti është një e mirë publike për të cilën garant mund të bëhet shteti. Që do të thotë se ne do ta blejmë shërbimin dhe do t’ua ofrojmë të gjithë atyre që kanë nevojë, duke ndërtuar një institucion të ri të bazuar në parimin Kujdes Shëndetësor Universal”, ka saktësuar kreu i PS, i cili ka pranuar se proçesi i transformimit nuk do të jetë i lehtë.

“Nuk është një sfidë e lehtë, nuk mjafton vetëm vullneti, është sfida e sfidave, por duhet të fillojnë të krijohen kushtet për kujdesin e shqiptarëve. Do të jetë një reformë radikale”, ka shtuar Rama.

Top Channel