Nga yll i televizionit në burg, Russell Brand dënohet me 10 vite e 6 muaj për përdhunim dhe sulme seksuale

Gjatë seancës së dënimit, gjyqtari Joel Bennathan deklaroi se Brand, tashmë 51 vjeç, ishte shndërruar në një “grabitqar seksual” në periudhën kur po ngjitej drejt famës, rreth dy dekada më parë.

“Ti ishe i zgjuar dhe, në sytë e shumë njerëzve, argëtues dhe karizmatik. Por ishe shndërruar gjithashtu në një grabitqar seksual”, u shpreh gjyqtari.

Ai theksoi se çdo grua ka të drejtën të refuzojë marrëdhëniet seksuale, pavarësisht veshjes, vendit ku ndodhet apo sasisë së alkoolit që mund të ketë konsumuar.

Sipas vendimit të gjykatës, Brand u shpall fajtor për përdhunimin e një gruaje në vitin 2009, si dhe për sulme seksuale ndaj tri grave të tjera, në periudhën kur po ndërtonte karrierën e tij në televizion dhe në industrinë e argëtimit britanik. Ai u shpall i pafajshëm për dy akuza të tjera përdhunimi dhe një akuzë për tentativë sulmi seksual.

Gjatë seancës dëgjimore, viktimat paraqitën deklaratat e tyre, duke përshkruar pasojat e rënda psikologjike dhe fizike që, sipas tyre, u kishin shkaktuar ngjarjet.

Njëra prej grave, e cila pretendoi se ishte sulmuar seksualisht në një lokal në Londër në vitin 2004, tha se për vite me radhë kishte përjetuar tronditje dhe vuajtje, ndërsa shihte Brand të shfaqej në media dhe të festohej për sjelljet e tij ndaj grave.

Gruaja që u përdhunua në vitin 2009 deklaroi se ishte drejtuar te alkooli për të bllokuar kujtimet dhe dhimbjen e përjetuar. Një tjetër viktimë e përshkroi Brand si një “grabitqar seksual që nuk ndjen pendesë për mënyrën se si sjellja e tij ka ndikuar në jetën time”.

Brand u bë i njohur në Britani në fillim të viteve 2000, fillimisht si prezantues televiziv dhe më pas përmes projekteve në radio, film dhe televizion. Karriera e tij mori hov veçanërisht pas prezantimit të emisionit “Celebrity Big Brother’s Big Mouth” në Channel 4.

Në vitin 2006, ai nisi gjithashtu një emision në BBC Radio, nga i cili u largua në vitin 2008 pas një skandali që përfshinte mesazhe fyese dhe seksiste drejtuar aktorit Andrew Sachs lidhur me mbesën e tij.

Në vitet e fundit, Brand ishte larguar nga imazhi i tij i dikurshëm dhe ishte përqendruar te temat e spiritualitetit, meditimit dhe fesë. Ai jetonte në Florida dhe kishte krijuar një audiencë të konsiderueshme në internet, me më shumë se 6.6 milionë abonentë në YouTube.

Hetimet ndaj Brand nisën pas publikimit, në vitin 2023, të një investigimi nga gazetat britanike “The Times”, “The Sunday Times” dhe televizioni Channel 4, ku disa gra të tjera ngritën akuza për abuzim seksual. Këto pretendime përfshinin persona të ndryshëm nga gjashtë gratë e përfshira në procesin gjyqësor.

Policia Metropolitane e Londrës konfirmoi gjithashtu se po heton dy akuza të tjera për përdhunim ndaj ish-yllit britanik. Kreu i policisë, Mark Rowley, deklaroi se nuk do të habitej nëse do të kishte edhe shumë gra të tjera që do të dilnin publikisht me pretendimet e tyre.

Nga ana tjetër, Shërbimi i Prokurorisë së Kurorës në Britani theksoi se vendimi i gjykatës tregon se fama, statusi dhe kalimi i kohës nuk e ndryshojnë rëndësinë themelore të pëlqimit në marrëdhëniet seksuale.

Policia britanike vlerësoi guximin e grave që denoncuan rastet, duke theksuar se dëshmitë e tyre mund t’u japin kurajë edhe viktimave të tjera të dhunës seksuale për të kërkuar drejtësi.

Russell Brand nuk shfaqi emocione gjatë komunikimit të vendimit. Përpara se të merrej nga autoritetet për të vuajtur dënimin, ai shkëmbeu disa fjalë me bashkëshorten e tij, Laura Gallacher, duke i thënë: “Do të jemi mirë”.

Top Channel