Rusia “humbet” Qipron: Shteti ishullor drejt një partneriteti strategjik me SHBA-në

Për dekada me radhë, Republika e Qipros ndoqi një politikë ekuilibri mes Lindjes dhe Perëndimit, duke ruajtur marrëdhënie të ngushta me Moskën, veçanërisht në fushën ekonomike dhe ushtarake.

Ky orientim u ndikua edhe nga marrëdhëniet e tensionuara me Uashingtonin pas pushtimit turk të ishullit në vitin 1974 dhe embargos amerikane të armëve të vendosur në vitin 1987.

Një kthesë e rëndësishme megjithatë ndodhi pas pushtimit rus të Ukrainës në shkurt 2022. Qiproja iu bashkua sanksioneve të Bashkimit Europian kundër Moskës, duke shënuar një largim nga politika tradicionale e balancimit mes Rusisë dhe Perëndimit. Paralelisht, marrëdhëniet me SHBA-në u intensifikuan, veçanërisht në fushën e sigurisë dhe mbrojtjes, kujton DW.

Afrimi u konkretizua përmes heqjes së embargos amerikane të armëve në vitin 2022, krijimit të qendrës së trajnimit CYCLOPS në Larnaka dhe përfshirjes së Qipros, në vitin 2025, në programet amerikane të prokurimit të pajisjeve ushtarake.

Këto zhvillime i kanë mundësuar Nikozisë të zgjerojë alternativat për modernizimin e forcave të armatosura. Tani, Qiproja po përpiqet të reduktojë gradualisht varësinë nga armatimet ruse, përfshirë tanket T-80 dhe sistemet e mbrojtjes ajrore Tor-M1 dhe Buk.

Vështirësitë në sigurimin e pjesëve të këmbimit dhe municioneve, si pasojë e sanksioneve ndaj Rusisë, duket se e kanë përshpejtuar këtë proces.

Ambasadori amerikan në Qipro, John Bresloë, ka bërë sakaq të ditura planet për modernizimin e bazës ajrore Andreas Papandreou në Pafos, shtimin e vizitave të anijeve luftarake amerikane në portet qipriote dhe zgjerimin e stërvitjeve të përbashkëta ushtarake.

Top Channel