Kontroll mbi SpaceX dhe Tesla-n përmes bashkimit të dy kompanive, Musk zbulon synimet e tjera

Sipas ekspertëve, marrëveshja nuk do t’i garantonte atij menjëherë 1 trilion dollarë në aksione, ndërsa bordi i SpaceX mund të rishikojë kushtet e shpërblimit pas bashkimit.

Një bashkim i mundshëm mes gjigantit të hapësirës SpaceX dhe prodhuesit të automjeteve elektrike Tesla mund t’i japë Elon Musk-ut një rrugë të shkurtër drejt kontrollit të perandorisë së tij të biznesit, pa pasur nevojë të përmbushë objektivat e vështira të vendosura në paketat e tij të kompensimit.

Sipas një analize të Reuters, e mbështetur në shqyrtimin e planeve të shpërblimit dhe mendimet e gjashtë ekspertëve të kompensimit ekzekutiv, bashkimi nuk do të sillte një pagesë të menjëhershme prej 1 trilion dollarësh për Musk-un. Megjithatë, ai mund t’i siguronte një ndikim vendimtar në drejtimin e kompanisë së re.

Analistët e Barclays vlerësojnë se, nëse SpaceX do të blinte Tesla-n, Musk do të zotëronte rreth 37% të kompanisë së bashkuar, por do të kontrollonte 56% të të drejtave të votës. Ky avantazh lidhet me strukturën e aksioneve të SpaceX, ku një pjesë e tyre kanë dhjetëfishin e fuqisë votuese në krahasim me aksionet e zakonshme.

Dallimi kryesor mes dy kompanive qëndron te mënyra se si janë ndërtuar paketat e kompensimit të Musk-ut. Në SpaceX, ai ka marrë të drejtat e votës për aksionet e parashikuara në plan përpara se të përmbushë objektivat për përfitimin e tyre ekonomik. Kjo i ka dhënë rreth 85% të kontrollit të votave në kompani.

Ndërsa në Tesla, situata është e kundërt. Paketa e kompensimit, e miratuar nga aksionarët vitin e kaluar dhe me vlerë potenciale deri në 1 trilion dollarë, parashikon që Musk të përmbushë objektiva të caktuara operacionale dhe financiare përpara se të përfitojë aksionet dhe të rrisë fuqinë e tij votuese.

Deri më tani, Musk nuk ka përmbushur asnjë prej objektivave të kësaj pakete. Edhe nëse do t’i realizonte të gjitha, ai do të arrinte rreth 29% të fuqisë votuese në Tesla.

Një bashkim mund të ndryshojë gjithashtu mënyrën se si llogaritet shpërblimi i tij financiar. Sipas kushteve të planit të Tesla-s, në rast të një ndryshimi të kontrollit të kompanisë, siç do të ishte blerja nga SpaceX, Musk mund të përfitojë shpërblime të lidhura me objektivat e kapitalizimit të tregut, pa qenë e nevojshme të përmbushë disa nga objektivat operacionale, si vendosja në qarkullim e një milion robotaksive.

Megjithatë, për të përfituar shpërblimin e parë do të nevojitej që kapitalizimi i tregut të Tesla-s të arrinte të paktën 2 trilionë dollarë, nga rreth 1.6 trilionë dollarë që vlerësohet aktualisht.

Nga ana tjetër, bordi i SpaceX mund të rishikojë paketën e kompensimit të Musk-ut pas një bashkimi, duke përshtatur objektivat financiare dhe operacionale me përmasat e kompanisë së re.

Aktualisht, plani i SpaceX përfshin objektiva tepër ambicioze, si krijimi i një kolonie me një milion banorë në Mars dhe ndërtimi i qendrave gjigante të të dhënave në hapësirë. Sipas vlerësimeve të firmës kërkimore Equilar, aksionet e parashikuara në këtë paketë mund të arrijnë një vlerë prej 719 miliardë dollarësh nëse përmbushet objektivi më i lartë i kapitalizimit të tregut.

Top Channel