Rreth 150 mijë qytetarë u mblodhën në qendër të Beogradit në një tubim masiv të organizuar nga lëvizja studentore opozitare, duke kërkuar ndryshimin e pushtetit dhe fundin e më shumë se 14 viteve të qeverisjes së Partisë Progresive Serbe (SNS), të drejtuar nga Aleksandar Vuçiç.
Protesta u zhvillua pak ditë para zgjedhjeve parlamentare, në një moment vendimtar për politikën serbe, ndërsa lëvizja e studentëve synon të sfidojë dominimin e gjatë të Vuçiçit dhe të sjellë një ndryshim në drejtimin e vendit.
Sipas vlerësimeve të Arkivit të Tubimeve Publike, një organizatë e pavarur që monitoron pjesëmarrjen në protesta, rreth 150 mijë persona morën pjesë në tubimin e zhvilluar në sheshin Slavija. Qytetarët u mblodhën nga drejtime të ndryshme të kryeqytetit, duke mbushur sheshin dhe rrugët përreth.
Me flamuj dhe slogane si “Studentët po fitojnë”, protestuesit marshuan nëpër Beograd, duke kërkuar luftën kundër korrupsionit dhe zgjedhje të drejta. Lëvizja studentore, e cila nuk ka një udhëheqës të vetëm, mbështet një listë me 250 kandidatë për parlamentin serb, shumë prej të cilëve vijnë nga bota akademike dhe nuk kanë përvojë të mëparshme politike.
Protestat në Serbi nisën pas shembjes së tendës së stacionit hekurudhor në Novi Sad, në vitin 2024, ku humbën jetën 16 persona. Tragjedia nxiti zemërim të gjerë publik, ndërsa akuzat për korrupsion dhe mungesë transparence u shndërruan në një lëvizje të gjerë kundër qeverisë.
Fillimisht, studentët kërkuan një hetim transparent për ngjarjen, por më pas protestat u zgjeruan, duke përfshirë thirrjet për zgjedhje të parakohshme dhe ndryshim politik.
Gjatë tubimit, profesori universitar Jugoslav Gasic, një prej kandidatëve të Listës së Studentëve, deklaroi se vendi duhet t’i japë fund viteve të keqqeverisjes dhe vendosjes së interesave partiake mbi ato të qytetarëve.
Ndërkohë, Aleksandar Vuçiç, i cili ka dominuar politikën serbe për më shumë se një dekadë, ka akuzuar vazhdimisht lëvizjen studentore se synon rrëzimin e shtetit me mbështetje nga jashtë. Gjatë një tubimi me mbështetësit e tij në Beograd, ai u bëri thirrje qytetarëve të mbështesin partinë e tij në zgjedhje.
Megjithatë, grupet e shoqërisë civile kanë ngritur shqetësime për kushtet në të cilat zhvillohet fushata elektorale, duke denoncuar raste të dyshuara të frikësimit, arrestimeve dhe keqpërdorimit të burimeve publike. Disa prej tyre kanë paralajmëruar se nuk janë përmbushur kushtet për zhvillimin e zgjedhjeve të lira dhe të ndershme.
Pavarësisht tensioneve, protestat e udhëhequra nga studentët kanë qenë kryesisht paqësore. Tubimi në Beograd shihet si një moment i rëndësishëm për lëvizjen, e cila synon ta kthejë pakënaqësinë e qytetarëve në mbështetje elektorale dhe të sfidojë pushtetin e Vuçiçit.
Top Channel
