Diagnostikimi me kancer në mushkëri, Papa Leone XIV përcjell mesazhin e parë pas operacionit

Në një mesazh drejtuar pjesëmarrësve të një simpoziumi me rastin e 10-vjetorit të dokumentit Amoris laetitia, të hartuar nga paraardhësi i tij, Papa Françesku, kreu i Kishës Katolike shprehu mirënjohjen për lutjet dhe angazhimin e besimtarëve.

“Siç e dini, gjatë këtyre ditëve nuk kam mundur të jem mes jush”, shkroi Ati i Shenjtë.

Papa vlerësoi shkëmbimin e përvojave dhe dëgjimin e kujdesshëm mes pjesëmarrësve, duke i cilësuar ato si një dhuratë për të gjithë Kishën. Në përfundim të mesazhit, Papa kërkoi që besimtarët të vazhdojnë të luten për të, duke theksuar se edhe ai lutet për ta.

Ndërkohë sipas informacionit të bërë publik nga ekipi mjekësor që po kujdeset për Papën, atij i është diagnostikuar adenokarcinoma pulmonare, një formë e zakonshme e kancerit të mushkërive.

Gjatë një ndërhyrjeje kirurgjikale rreth 90-minutëshe në Romë, mjekët hoqën lobin e poshtëm të njërës prej mushkërive të tij.

Mjekët Luigi Carbone dhe Stefano Margaritora bënë të ditur se rikuperimi i Papës po ecën sipas pritshmërive. Ai ka mundur të ecë në ambientet e dhomës së tij në spital dhe ka konsumuar mëngjesin dhe drekën.

Gjatë fundjavës, Papa kishte njoftuar besimtarët në Sheshin e Shën Pjetrit për ndërhyrjen e planifikuar, duke bërë të ditur se masa e zbuluar në mushkëri ishte identifikuar në një fazë të hershme.

Papa Leone XIV ka anuluar të gjitha daljet publike deri më 20 tetor, për t’iu kushtuar trajtimit dhe rikuperimit.

Megjithatë, sipas informacionit të publikuar, ai pritet të zhvillojë muajin e ardhshëm një udhëtim të gjatë në Amerikën e Jugut, megjithëse realizimi i tij do të varet nga ecuria e gjendjes shëndetësore dhe këshillat e mjekëve.

Top Channel