Shmang operacionin, por jo shqetësimin: Mbappe mund të humbasë ndeshjen e radhës me Real Madridin

Pas një dite stabilizimi, Mbappé ka nisur të hënën punën për rikuperimin në Valdebebas dhe do ta vazhdojë edhe sot. Gjendja e tij duket më e mirë nga sa u frikësua fillimisht, pasi dëmtimi që pësoi me Francën është reduktuar në një hiperekstension të kapsulës së pasme të gjurit të majtë.

Parashikimi fillestar është për një mungesë prej 10 deri në 12 ditësh, por situata mund të kishte qenë shumë më serioze.

Mbappé ndjeu dhimbje pasi shënoi në ndeshjen Turqi-Francë të premten e kaluar dhe vendimi për të mos e vazhduar lojën rezultoi vendimtar. Sipas ekzaminimeve, nëse ai do të kishte vijuar të luante, rreziku për një dëmtim shumë të rëndë në gju do të kishte qenë i lartë, deri në atë pikë sa mund t’i kushtonte një pjesë të madhe të sezonit.

Në kampin e Real Madridit pati shqetësim të madh menjëherë pas dëmtimit. Klubi madrilen ishte në kontakt të vazhdueshëm me stafin mjekësor të Federatës Franceze dhe, për një moment, u konsiderua edhe mundësia e një ndërhyrjeje kirurgjikale.

Megjithatë, ekzaminimet e mëtejshme treguan se operacioni nuk ishte i nevojshëm. Ky është një lajm pozitiv për Real Madridin, por klubi nuk dëshiron të marrë asnjë rrezik me yllin francez. Mbappé do të rikthehet vetëm kur të jetë plotësisht gati.

Sipas afatit të parashikuar të rikuperimit, francezi mund të jetë i gatshëm për ndeshjen e 10 tetorit kundër Villarrealit, në “Santiago Bernabéu”. Megjithatë, rikthimi në fushë në atë sfidë mbetet ende në pikëpyetje.

Dilema për stafin teknik është e madhe, pasi menjëherë pas ndeshjes me Villarrealin vijnë dy sfida të rëndësishme: transfertë në Romë më 14 tetor dhe më pas “El Clásico” ndaj Barcelonës më 25 tetor.

Për këtë arsye, mënyra se si Mbappé do të rikthehet në ritmin e garës do të jetë vendimtare. Në rast se stafi teknik vendos të mos rrezikojë me Mbappén, Real Madridi ka disa alternativa për repartin ofensiv.

Një nga opsionet më të dukshme është aktivizimi i Espí në vendin e francezit. Megjithatë, trajneri Mourinho e sheh më shumë sulmuesin e Spanjës U-21 si një alternativë për pozicionin e qendërsulmuesit, sidomos nëse ndeshja kërkon një lojtar fizik për të përballuar mbrojtjet kundërshtare.

Një tjetër mundësi është Jude Bellingham, i cili mund të përdoret si “false 9”, një rol që anglezi e ka luajtur edhe në fillimet e tij me Carlo Ancelottin.

Në këtë skenar, Arda Güler do të pozicionohej pas sulmuesit, duke krijuar mundësinë që lojtari turk të bashkëjetojë në të njëjtin formacion me Diomanden në krahun e djathtë. Por të gjitha këto alternativa varen nga një vendim: gjendja e Mbappés.

Real Madridi nuk dëshiron të përsërisë situatën e sezonit të kaluar, kur francezi vazhdoi të luante me probleme fizike derisa u detyrua të ndalonte. Më pas, ai iu nënshtrua trajtimit te specialisti i njohur Bertrand Sonnery-Cottet dhe arriti të rikuperohej plotësisht.

Këtë herë, mesazhi në Madrid është i qartë: Mbappé do të rikthehet vetëm kur të jetë 100% i gatshëm.

Top Channel