Scott McTominay përfundon në sallën e operacionit, ylli i Napolit do t’i nënshtrohet ndërhyrjes në zemër

Klubi italian njoftoi se lojtari do t’i nënshtrohet një procedure të ablacionit për trajtimin e çrregullimit të ritmit të zemrës. Sipas Napolit, McTominay pritet të rikthehet në dispozicion pas pushimit të kombëtareve.

“Pas shfaqjes së një aritmie të lehtë beninje, Scott McTominay do t’i nënshtrohet një ndërhyrjeje korrigjuese me anë të ablacionit kardiak në ditët e ardhshme. Ai do të jetë sërish i disponueshëm pas pushimit të kombëtareve”, njoftoi Napoli.

Aritmia kardiake nënkupton se zemra mund të mos rrahë gjithmonë në ritmin e saj normal. Procedura që do të kryejë mesfushori është një ndërhyrje minimale invazive, e cila përdor impulse elektrike për të trajtuar zonat që shkaktojnë çrregullimin e ritmit.

McTominay, 29 vjeç, iu bashkua Napolit në gushtin e vitit 2024 pas largimit nga Manchester United, në një transferim me vlerë rreth 25.7 milionë paund.

Mesfushori skocez ishte pjesë e akademisë së Manchester United që në moshë të vogël dhe gjatë periudhës së tij me “Djajtë e Kuq” zhvilloi 255 ndeshje, duke shënuar 29 gola dhe dhënë 8 asistime.

Pas transferimit në Itali, McTominay ka pasur një ndikim të rëndësishëm te Napoli, ku në 82 paraqitje ka shënuar 27 gola dhe ka dhënë kontribute të tjera në fazën sulmuese.

Klubi italian nuk ka bërë të ditur një datë të saktë për rikthimin e tij, por ka konfirmuar se lojtari pritet të jetë sërish i gatshëm pas ndërprerjes së ndeshjeve për ekipet kombëtare.

Top Channel