Pas triumfit në garën Sprint, Marc Marquez ka kompletuar një fundjavë perfekte duke dominuar edhe garën kryesore të Çmimit të Madh të Aragonit në MotoGP. Duke pilotuar motorin e tij Ducati, spanjolli tregoi një formë të jashtëzakonshme në pistën e “Motorland”, duke lënë pas tij Pedro Acosta-n me KTM dhe Marco Bezzecchi-n, i cili e nisi garën nga “pole position”.
Momenti vendimtar i garës erdhi në xhiron e gjashtë. Në fund të drejtëzës më të gjatë të qarkut, Marquez zhvilloi një duel shpejtësie fantastik dhe kaloi me sukses Bezzecchi-n, duke i hapur rrugën vetes drejt një fitoreje të padiskutueshme. Ky moment u shfrytëzua menjëherë edhe nga Pedro Acosta, i cili gjithashtu la pas italianin për të siguruar shkallën e dytë të podiumit.
Për Marquez, ky është suksesi i katërt në gjashtë garat e fundit, çka dëshmon formën e frikshme që “Kanibali” po kalon. Me këto pikë maksimale, ai parakalon pikërisht Bezzecchi-n në renditjen e përgjithshme, duke i rrëmbyer vendin e dytë me 5 pikë avantazh, dhe hidhet në sulm për të kapur liderin e kampionatit, Jorge Martin. Ky i fundit e mbylli garën i pesti, menjëherë pas shpinës së Alex Marquez.
Nga ana tjetër, ishte një tjetër fundjavë makthi për kampionin e botës në fuqi, Francesco Bagnaia. Piloti i Ducati Lenovo u detyrua ta mbyllë garën para kohe pas një rrëzimi që në çerekun e parë të saj, një përfundim i hidhur që thellon krizën e tij të rezultateve.
Lufta për kurorën e MotoGP po bëhet gjithnjë e më e paparashikueshme, me Marquez që ka ndezur motorët në momentin kritik të sezonit dhe tashmë paralajmëron të gjithë rivalët.
Top Channel
