Hezbollahu kundër marrëveshjes Liban-Izrael: Nuk dorëzojmë armët

Sekretari i përgjithshëm i Hezbollahut, Naim Qassem, deklaroi se lëvizja shiite e kundërshton marrëveshjen dhe kërkoi braktisjen e saj.

“Ne jemi kundër marrëveshjes kornizë dhe bëjmë thirrje për braktisjen e saj”, tha Qassem gjatë një fjalimi të transmetuar nga televizioni Al-Manar.

Marrëveshja, e nënshkruar më 26 qershor nën kujdesin e Shteteve të Bashkuara, parashikon që ushtria libaneze të marrë kontrollin e zonave në jug të vendit. Procesi lidhet me çarmatimin gradual të Hezbollahut, fillimisht në disa zona të përcaktuara si “zona pilot”, nga të cilat forcat izraelite do të tërhiqeshin më pas.

Qassem e kundërshtoi edhe këtë mekanizëm, duke e cilësuar marrëveshjen si “të padrejtë, të paligjshme dhe poshtëruese”.

“Ne nuk i pranojmë as zonat pilot dhe as atë që vjen pas krijimit të tyre”, deklaroi ai.

Udhëheqësi i Hezbollahut kundërshtoi gjithashtu krijimin e një komiteti verifikimi, i cili pritet të mbikëqyrë zbatimin e marrëveshjes dhe procesin e çarmatimit të organizatës.

Gjatë bisedimeve të zhvilluara në Romë në fillim të gushtit, Libani dhe Izraeli diskutuan për përbërjen e këtij mekanizmi. Komiteti pritet të monitorojë vendosjen e ushtrisë libaneze në zonat pilot, si dhe shkatërrimin e armëve dhe infrastrukturës ushtarake të Hezbollahut.

Një raund i ri negociatash pritet të zhvillohet në shtator, megjithëse ende nuk është përcaktuar një datë konkrete.

Ndërkohë, tensionet në jug të Libanit vijojnë. Izraeli vazhdon të kryejë sulme në territorin libanez, ndërsa mban nën kontroll edhe disa zona në jug të vendit.

Pavarësisht uljes së aktivitetit ushtarak të Hezbollahut gjatë javëve të fundit, Qassem theksoi se organizata nuk ka ndërmend të dorëzohet.

“Ne e mbajmë kokën lart dhe nuk dorëzohemi”, deklaroi ai, duke përsëritur refuzimin e Hezbollahut për çarmatimin dhe për kushtet e marrëveshjes kornizë mes Libanit dhe Izraelit.

Top Channel