Armando Broja nuk është grumbulluar nga Burnley për transfertën e kësaj të shtune ndaj Norwich Cityt, një tjetër sinjal që ngre pikëpyetje të mëdha për të ardhmen e sulmuesit shqiptar te klubi anglez.
24-vjeçari kishte marrë minuta në tri ndeshjet e fundit, por nuk arriti të linte gjurmë me paraqitjet e tij. Në sfidën e fundit ndaj Bradford Cityt në Carabao Cup, Burnley u eliminua pas penalltive, ndërsa Broja nuk mundi të ndryshonte fatin e skuadrës.
Tashmë, në javën e tretë të Championship, emri i tij mungon në listën e lojtarëve të grumbulluar për përballjen me Norwichin. Burnley ka pasur një nisje të vështirë të sezonit dhe trajneri Nicky Hayen duket se po merr vendime që mund të kenë pasoja edhe për të ardhmen e sulmuesit kuqezi.
Mungesa e Brojës në një moment kur merkatoja është ende e hapur nuk është një detaj për t’u anashkaluar. Afati i merkatos angleze mbyllet më 1 shtator dhe, nëse situata nuk ndryshon, përjashtimi nga skuadra mund të shihet si një sinjal se Burnley është i gatshëm të dëgjojë oferta për të.
Broja iu bashkua Burnleyt në verën e vitit 2025 nga Chelsea, në një marrëveshje që u raportua rreth 20 milionë paund dhe firmosi një kontratë pesëvjeçare.
Por aventura e tij nuk ka shkuar sipas pritshmërive. Tani, pas vetëm pak javësh nga nisja e sezonit të ri, sulmuesi shqiptar duket se ndodhet sërish përballë një momenti vendimtar në karrierë.
Mungesa ndaj Norwichit mund të jetë më shumë se një zgjedhje teknike: mund të jetë sinjali i parë i qartë se Burnley po i tregon Brojës derën.
Top Channel
