Chelsea e ka nisur aventurën në Carabao Cup me një fitore të pastër 2-0 ndaj Luton Town, në një mbrëmje ku protagonisti kryesor ishte sulmuesi veteran Danny Welbeck.
Pavarësisht se në formacion ishin Cole Palmer dhe Morgan Rogers, të cilët kishin shkëlqyer në ndeshjen e mëparshme ndaj Fulhamit, ishte pikërisht Welbeck ai që zhbllokoi takimin dhe i dha avantazhin skuadrës së drejtuar nga Xabi Alonso.
Sulmuesi 35-vjeçar, i aktivizuar në vend të Joao Pedros, shfrytëzoi një krosim të Malo Gustos dhe me një goditje me kokë dërgoi topin në rrjetë, duke shënuar gol në debutimin e tij me Chelsea-n.
Chelsea dominoi pjesën më të madhe të takimit, duke mbajtur Lutonin të tërhequr dhe duke krijuar disa mundësi të mira.
Cole Palmer ishte pranë golit në pjesën e parë, ndërsa Reece James gjithashtu testoi portierin Josh Keeley. Në një tjetër rast, Morgan Rogers goditi traversën pas një aksioni të rrezikshëm të Chelsea-t.
Welbeck shënoi pas vetëm pak minutash nga starti i pjesës së dytë, duke i dhënë Chelsea-t avantazhin që e kishte kërkuar gjatë gjithë ndeshjes.
Lutoni u përpoq të reagonte dhe për një moment arriti të mbajë më shumë topin, por skuadra e Jack Wilshere nuk pati forcën e nevojshme për të rrezikuar seriozisht portën e Chelsea-t.
Chelsea vazhdoi të ishte skuadra më kërkuese dhe në fund gjeti edhe golin e dytë.
Braziliani i talentuar Estevao u përfshi në aksionin që solli golin, me goditjen e tij që u devijua nga Hakeem Odoffin dhe përfundoi në rrjetë.
Kështu, Chelsea e mbylli takimin me fitoren 2-0 dhe siguroi kalimin në raundin tjetër të Carabao Cup.
Top Channel
