Putin merr kontrollin e objekteve të sulmuara vazhdimisht nga ukrainasit: Është një çështje sigurie

Masa prek sektorë si karburantet, energjia, transporti, komunikimet dhe logjistika, në rast se pronarët privatë nuk marrin masa të mjaftueshme për mbrojtjen e tyre nga sulmet ose nuk arrijnë të rikthejnë shpejt funksionimin pas një goditjeje.

Në këto raste, qeveria ruse mund të vendosë “administrim të përkohshëm”, duke marrë kontrollin mbi pronën, të drejtat e pronësisë dhe aksionet e kompanive.

Sipas dekretit, masa lidhet me rritjen e kërcënimeve ndaj sigurisë së infrastrukturës kritike në territorin rus.

Zëdhënësi i Kremlinit, Dmitry Peskov, tha se disa pronarë biznesesh nuk po marrin masat e nevojshme për mbrojtjen e objekteve nga dronët. Peskov deklaroi se qeveria dhe agjencitë përkatëse do të analizojnë rastet dhe do të propozojnë marrjen e masave kur objektet kritike nuk konsiderohen të sigurta.

Vendimi vjen në një periudhë kur Ukraina ka intensifikuar sulmet me dronë në territorin rus, duke goditur edhe objekte të lidhura me energjinë, karburantet dhe logjistikën.

Në të njëjtën kohë, Rusia ka shtuar sulmet ajrore ndaj Ukrainës. Sipas Forcave Ajrore ukrainase, gjatë një nate Rusia lëshoi dy raketa dhe rreth 150 dronë, ndërsa Ukraina pretendoi se rrëzoi 124 prej tyre.
Kievi ka paralajmëruar ndërkohë për mungesë të interceptorëve për sistemet amerikane Patriot, të cilat janë ndër mjetet kryesore të Ukrainës për mbrojtjen nga raketat balistike.

Presidenti ukrainas Volodymyr Zelensky konfirmoi se Ukraina ka marrë një numër të vogël raketash Patriot, por tha se nevojiten më shumë.

Me dekretin e ri, Moska synon të rrisë kontrollin shtetëror mbi objektet strategjike, ndërsa sulmet ukrainase me dronë po krijojnë presion të shtuar mbi infrastrukturën dhe furnizimet energjetike ruse.

Top Channel