Emiliano Martinez është i gatshëm të transferohet te Chelsea, pavarësisht faktit se londinezët nuk do të luajnë në kompeticionet europiane këtë sezon.
Portieri argjentinas i është ofruar klubit anglez nga përfaqësuesit e tij, ndërsa Aston Villa po kërkon një zgjidhje për të ardhmen e 33-vjeçarit.
Martinez dukej pranë largimit nga Aston Villa edhe verën e kaluar, kur u përfol për një transferim te Manchester United. Megjithatë, drejtuesit e klubit nga Manchesteri vendosën të mos ndjekin planin e trajnerit të atëhershëm Ruben Amorim dhe preferuan të investonin te Senne Lammens.
Pas qëndrimit në Villa Park, situata e Martinez ka ndryshuar ndjeshëm. Aston Villa ka afruar Zion Suzuki dhe pritet që portieri japonez të jetë zgjedhja e parë mes shtyllave, duke e bërë të ardhmen e Martinez në klub gjithnjë e më të pasigurt.
Portieri argjentinas ishte pranë transferimit te Juventus gjatë kësaj vere, por marrëveshja me klubin italian nuk u konkretizua.
Sipas raportimeve të fundit, përfaqësues të Martinez e kanë ofruar portierin te Chelsea dhe Tottenham. Lajmi u raportua fillimisht nga TEAMtalk, ndërsa më pas u konfirmua edhe nga gazetarë të njohur si David Ornstein dhe Fabrizio Romano.
Ornstein raportoi se Aston Villa e ka vënë Martinez në dispozicion për një transferim dhe se Chelsea po shqyrton mundësinë e firmosjes me të.
Ndërkohë, Fabrizio Romano bëri të ditur se Chelsea ka nisur bisedimet me kampin e portierit argjentinas për një transferim të mundshëm në ditët e fundit të merkatos.
“Dibu” Martinez është i interesuar për një kalim te Chelsea, ndërsa klubi londinez po vlerëson nëse do ta konkretizojë këtë mundësi.
Një detaj i rëndësishëm është se Martinez është i gatshëm të transferohet te Chelsea edhe pse kjo do të nënkuptonte largimin nga Aston Villa, një klub që këtë sezon do të marrë pjesë në Champions League.
Romano raporton se portieri do të pranonte menjëherë një transferim te Chelsea, edhe nëse skuadra londineze nuk do të luajë në asnjë kompeticion europian gjatë sezonit 2026/27.
Vendimi përfundimtar tashmë i takon Chelsea-t.
Sipas TEAMtalk, Aston Villa mund të jetë e gatshme ta shesë Martinez për më pak se 10 milionë paund.
Chelsea ka disa portierë në organikë, por Robert Sanchez vazhdon të jetë objekt kritikash. Spanjolli pati një paraqitje të dobët në ndeshjen hapëse të Premier League kundër Fulhamit, ku u bë përgjegjës për të dy golat e pësuar nga skuadra e tij.
Nëse Chelsea synon të luftojë seriozisht për titullin e Premier League dhe të afrohet me Arsenal, drejtuesit e klubit mund ta shohin Martinez si një alternativë me eksperiencë dhe cilësi të provuara.
Top Channel
