Pas dy muajsh SHBA rinis luftën ndaj drogës në rajon, godet një anije në Paqësor, humbin jetën dy personat në bord 24/08 11:54
Skema e ngjyrave
Madhësia e shkrimit
Ushtria amerikane ka goditur një tjetër anije të dyshuar për trafik droge në Paqësorin lindor, duke vrarë dy persona. Sulmi shënon aksionin e parë të këtij lloji pas më shumë se dy muajsh.
Komanda Jugore e SHBA-së, SOUTHCOM, njoftoi se sulmi u krye të dielën ndaj një anijeje që dyshohet se po përdorej në rrugët e trafikimit të drogës në Paqësorin lindor. Sipas autoriteteve amerikane, dy persona u vranë gjatë operacionit. Ende nuk janë bërë publike detaje të tjera për identitetin e tyre apo sasinë e drogës që dyshohet se transportonte anija.
“This operation is a clear and decisive reminder that SOUTHCOM is taking the fight directly to the cartels.”
On August 23, under #SOUTHCOM Commander Gen. Francis L. Donovan’s direction, Joint Task Force Western Hemisphere executed a lethal kinetic strike on a low-profile vessel… pic.twitter.com/aIw1qn36gd
— U.S. Southern Command (@Southcom) August 24, 2026
Sulmi është pjesë e operacionit amerikan “Shtiza Jugore”, i nisur në shtator 2025 kundër karteleve të drogës në rajon. Sipas të dhënave të publikuara më herët, gjatë operacionit janë goditur të paktën 67 anije dhe janë vrarë më shumë se 200 persona.
Administrata e presidentit Donald Trump e konsideron luftën kundër karteleve të drogës si një “konflikt të armatosur”, ndërsa personat e vrarë në këto operacione i cilëson si “luftëtarë të paligjshëm”.
Qeveria amerikane argumenton gjithashtu se ushtria mund të kryejë sulme vdekjeprurëse pa një proces gjyqësor paraprak, duke iu referuar një opinioni sekret të Departamentit të Drejtësisë. Kjo strategji ka shkaktuar kritika nga disa anëtarë të Kongresit dhe organizatat për të drejtat e njeriut, të cilat kërkojnë që të dyshuarit për trafik droge të arrestohen dhe të përballen me drejtësinë.
Senatori demokrat Tim Kaine ka ngritur gjithashtu pikëpyetje mbi ligjshmërinë e operacioneve, duke pretenduar se disa prej sulmeve mund të kenë shkaktuar vdekjen e personave që nuk ishin të përfshirë në trafikun e drogës. Ndërkohë, komandanti i SOUTHCOM, gjenerali Francis L. Donovan, ka mbrojtur operacionin, duke deklaruar se ushtria amerikane do të vazhdojë presionin ndaj karteleve dhe do të ndërpresë aktivitetet e tyre në rajon.
Misioni i plotë i operacionit “Shtiza Jugore” mbetet i klasifikuar nga autoritetet amerikane.
Top Channel
