“Më kujton Haalandin”/ Legjenda e Gjermanisë nuk i kursen elozhet për Espositon: Është e ardhmja e Interit dhe Italisë

Ish-sulmuesi i Gjermanisë dhe fituesi i Kupës së Botës në vitin 1990 ka mbetur i impresionuar nga aftësitë e Espositos, duke e veçuar atë si një lojtar me potencial të jashtëzakonshëm.

“Ai djalë është i veçantë”, është shprehur Klinsmann, i cili e ka krahasuar në një farë mënyre zhvillimin e Espositos me atë të Erling Haaland.

Klinsmann u ndal veçanërisht te goli i shënuar nga Esposito ndaj Monzës, duke vlerësuar mënyrën spektakolare se si sulmuesi realizoi me thembër.

“Nuk mbaj mend të kem shënuar ndonjëherë me thembër. Ajo që bëri Pio ishte e bukur. Por përveç golit, ai ka një potencial të madh”, deklaroi ish-sulmuesi.

Sipas Klinsmann, Esposito ka ende shumë për të mësuar, por mënyra më e mirë për t’u zhvilluar është të marrë minuta dhe përgjegjësi në fushë.

“Ai ende ka shumë hapësirë për t’u rritur. Dhe ti rritesh me minutat e lojës, me fushën. Jam shumë i lumtur që ai po merr hapësirë tani”, tha Klinsmann.

Ai kritikoi gjithashtu mentalitetin në futbollin italian për sa i përket aktivizimit të talenteve të rinj.

“Lojtarët e rinj duhet të luajnë. Ata duhet të jenë në gjendje të bëjnë gabime, sepse edhe duke bërë gabime bëhesh i madh. Është gjithashtu një çështje kulture dhe filozofie, dhe në Itali je pak prapa në këtë drejtim”, theksoi ai.

Për të ilustruar potencialin e Espositos, Klinsmann përmendi edhe Haalandin.

“Haaland ishte tashmë titullar në moshën 17 ose 18 vjeç. Esposito më kujton pak atë”, u shpreh gjermani.

Klinsmann vlerësoi edhe profilin teknik të sulmuesit të Interit, duke theksuar se ai është i aftë të kontribuojë në disa aspekte të lojës.

“Ai është i mirë me të dyja këmbët, zë mirë zonën e penalltisë dhe gjithashtu lidhet me shokët e skuadrës. E shpërndan topin majtas dhe djathtas, është pjesë e lojës dhe më pas shënon”, tha ai.

Sipas Klinsmann, Esposito është një qendërsulmues klasik, për të cilin statistikat e golave do të jenë gjithmonë vendimtare.

“Pio është një numër tipik nëntë. Sulmuesit maten gjithmonë me numra, me gola. Për një numër nëntë, gjithçka që ka rëndësi është shënimi i golave. Ne qendërsulmuesit jetojmë për golat gjithë jetën tonë”, deklaroi Klinsmann.

Një nga çështjet më interesante te Interi lidhet me konkurrencën në repartin ofensiv. Marcus Thuram aktualisht po rikuperohet nga një dëmtim, ndërsa Esposito ka përfituar nga mungesa e tij.

Klinsmann beson se trajneri Cristian Chivu do të ketë nevojë për të gjithë sulmuesit, sidomos nëse Interi synon të bëjë një paraqitje të fortë në Ligën e Kampionëve.

“Për Ligën e Kampionëve kemi absolutisht nevojë për të gjithë. Lautaro është i pazëvendësueshëm, ai është lideri dhe kapiteni. Shpresoj që Marcus dhe Pio të kenë kohë për të treguar aftësitë e tyre dhe për të gjetur ritmin”, tha ai.

Megjithatë, Klinsmann paralajmëroi se rikthimi i Thuram mund të mos jetë aq i thjeshtë nëse Esposito vazhdon të paraqitet në këtë nivel.

“Do të jetë e vështirë për Marcusin të marrë minuta tani, sepse nëse Pio vazhdon kështu, nuk mund ta lini në stol për shumë kohë. Ai është e ardhmja e Interit dhe Italisë”, theksoi Klinsmann.

Ish-sulmuesi gjerman foli edhe për potencialin e skuadrës së Interit dhe mundësinë që zikaltrit të ndryshojnë skemën taktike gjatë sezonit.

Sipas tij, Interi nuk duhet të jetë i kufizuar vetëm në skemën 3-5-2 dhe mund të kalojë në një formacion me katër mbrojtës, në varësi të kundërshtarit.

“Me dy sulmues qendrorë si Lautaro dhe Pio ose Thuram mund të luash 4-4-2. Edhe anësorët janë aty”, tha Klinsmann.

Ai beson se ndryshimi i sistemit mund të jetë veçanërisht i rëndësishëm në Champions League.

“Në Ligën e Kampionëve mund të surprizosh duke luajtur në një mënyrë të ndryshme, sepse të gjitha ekipet kryesore e njohin Interin përmendësh tashmë. Kështu që larmia është e mirë”, u shpreh ai.

Në fund, Klinsmann vendosi objektivin e Interit në një nivel shumë të lartë. Sipas tij, zikaltrit duhet të synojnë triumfin në Champions League, edhe pse përballë do të kenë ekipe si PSG, Manchester City dhe Bayern Munich.

“Detyra e Interit është të fitojë Ligën e Kampionëve kundër ekipeve si PSG, City ose Bayern. Interi duhet të ketë një Ligë Kampionësh të mirë”, përfundoi Klinsmann.

Top Channel