Mori pjesë në protestat anti-qeveritare të janarit, ekzekutohet një person në Iran

“Sahram Sadeghi, i cili u dënua me vdekje për veprim në favor të regjimit sionist dhe Shteteve të Bashkuara, u ekzekutua këtë mëngjes”, raportoi Mizan, agjencia e lajmeve e gjyqësorit iranian.

Sipas Mizan, Sadeghi kishte sulmuar oficerët e policisë në Karaj, në perëndim të Teheranit, më 8 janar me makinën e tij, duke plagosur shtatë prej tyre. Ekzekutimet janë rritur në Iran që nga fillimi i luftës që pasoi sulmin e SHBA-së dhe Izraelit ndaj vendit më 28 shkurt, ndërsa disa nga të ekzekutuarit ishin dënuar për pjesëmarrje në protesta.

Lëvizja protestuese filloi në fund të dhjetorit për shkak të rritjes së kostove të jetesës dhe shpejt u përshkallëzua në demonstrata masive antiqeveritare, të cilat kulmuan më 8 dhe 9 janar.

Autoritetet iraniane kanë pranuar se më shumë se 3,000 njerëz janë vrarë, duke ia atribuar dhunën “akteve terroriste” që ata thonë se u orkestruan nga Shtetet e Bashkuara dhe Izraeli.

Organizatat joqeveritare me seli jashtë vendit, nga ana e tyre, flasin për një goditje brutale që ka shkaktuar mijëra vdekje. Në vitin 2025, autoritetet iraniane ekzekutuan të paktën 1,639 persona, numri më i lartë i regjistruar që nga viti 1989, sipas organizatave Iran Human Rights dhe Ensemble contre la peine de mort (ECPM).

Sipas organizatave të të drejtave të njeriut, përfshirë Amnesty International, Irani ka numrin e dytë më të lartë të ekzekutimeve në botë, pas Kinës.

Top Channel