Barcelona duket se i ka të qarta objektivat për ditët e fundit të merkatos së verës. Klubi katalanas ka vendosur të insistojë për dy emra të mëdhenj: Rodri Hernández dhe Julián Álvarez.
Pavarësisht se kanë mbetur vetëm pak më shumë se dy javë deri në mbylljen e merkatos, te Barcelona nuk po mendojnë për alternativa. Drejtuesit besojnë se të dy futbollistët janë të vendosur për t’iu bashkuar projektit të trajnerit Hansi Flick.
Rodri, Barcelona beson te marrëveshja
Situata e Rodrit duket më e avancuar. Mesfushori spanjoll, i cili këtë verë është rikthyer te Manchester City pas pushimeve, mbetet objektivi kryesor i Barcelonës për mesfushën.
Manchester City kërkon rreth 80 milionë euro për kartonin e tij, ndërsa Barcelona nuk dëshiron të shkojë deri në këtë shifër. Megjithatë, katalanasit janë të gatshëm ta përmirësojnë ofertën dhe, përmes bonuseve, mund të afrohen deri në 70 milionë euro.
Avantazhi i madh i Barcelonës është vetë dëshira e Rodrit. Futbollisti madrilen e ka bërë të qartë se dëshiron të luajë në “Camp Nou”, çka i vështirëson Manchester Cityt krijimin e një gare mes klubeve. Në Barcelonë besojnë se marrëveshja mund të arrihet, më së voni, gjatë javës së ardhshme.
Julián Álvarez, objektivi që nuk ndryshon
Më e komplikuar është situata e Julián Álvarez. Atlético Madrid vazhdon të jetë kategorik dhe nuk dëshiron ta shesë sulmuesin argjentinas, por Barcelona beson se lojtari nuk e ka braktisur dëshirën për t’u larguar.
Sipas raportimeve të publikuara në Spanjë dhe Argjentinë, Álvarez vazhdon të shpresojë për një transferim te Barcelona dhe gjatë ditëve të ardhshme mund të tentojë të gjejë një zgjidhje me drejtuesit e Atlético Madridit.
Një nga prioritetet e tij është zhvillimi i një takimi me Miguel Ángel Gil Marín, CEO-n e klubit madrilen. Sipas informacioneve të publikuara, lojtari beson se Gil Marín i kishte premtuar më herët se do të tregohej i hapur ndaj kërkesës së tij për t’u larguar nëse një ditë do të kërkonte transferimin te Barcelona.
Nga katalanasit, mesazhi është i qartë: Julián Álvarez është aktualisht alternativa A, B, C dhe D. Barcelona ka informacion për disa sulmues të nivelit të lartë dhe po monitoron situatën, por deri tani nuk ka aktivizuar seriozisht pista të tjera. Drejtuesit besojnë se operacioni për Álvarez ka ende mundësi të realizohet.
Dy ndeshje që mund të ndikojnë te situata
Vëmendja tani është edhe te Atlético Madrid. Skuadra e Diego Simeones do të luajë më 19 gusht në “Metropolitano” ndaj Málaga-s dhe katër ditë më vonë do të përballet në shtëpi me Villarrealin.
Në këto dy ndeshje mund të shihet nëse Álvarez do të grumbullohet dhe, nëse luan, si do të reagojnë tifozët e Atlético Madridit ndaj tij.
Sulmuesi argjentinas nuk u grumbullua në miqësoren e fundit të skuadrës në Marseille, pasi kishte vetëm katër ditë që ishte rikthyer në stërvitje.
Çfarë po ndodh realisht me Álvarez?
Rreth situatës së argjentinasit kanë qarkulluar versione të ndryshme.
Nga Spanja është raportuar se Álvarez u ka pranuar shokëve të skuadrës se mënyra se si e trajtoi situatën nuk ishte e duhura dhe se, për sa kohë të mbajë fanellën e Atlético Madridit, do ta mbrojë atë me 100 për qind. Në Argjentinë, megjithatë, ky version është kundërshtuar.
Gazetari Martín Arévalo, i cili kishte intervistuar Álvarez gjatë Botërorit, ka dhënë një tjetër version në ESPN. Sipas tij, drejtuesit e Atlético Madridit i kishin kërkuar vetë lojtarit që kërkesën për largim ta bënte publike, pasi ai e kishte shprehur më parë privatisht dëshirën për t’u larguar.
Arévalo e përshkroi situatën si shumë të pakëndshme për futbollistin. Sipas tij, Álvarez nuk dëshiron të qëndrojë në Madrid, ndërsa Atlético nuk ka ndërmend ta shesë nëse nuk aktivizohet klauzola e largimit, e cila është shumë e lartë.
Edhe pse Simeone e vlerëson maksimalisht sulmuesin dhe dëshiron ta ketë në skuadër, situata mes palëve duket gjithnjë e më e komplikuar.
Barcelona pret lëvizjen e radhës
Në këtë moment, Barcelona po qëndron në pritje. Klubi katalanas beson se Álvarez do të bëjë një tjetër përpjekje për të bindur Atlético Madridin dhe se historia nuk ka përfunduar ende.
Nëse argjentinasi arrin të krijojë një rrugë për largim, Barcelona është gati të ndërhyjë.
Për momentin, mesazhi nga “Camp Nou” është i qartë: Julián Álvarez mbetet objektivi numër një për sulmin, ndërsa Rodri është emri që Barcelona shpreson ta mbyllë shumë shpejt.
Top Channel
