Hollywood-i në zi, ndahet nga jeta në moshën 80-vjeçare Vincent Pastore, aktori i “The Sopranos”

Sipas BBC, Pastore u gjet i pajetë në banesën e tij në lagjen Bronx të Nju Jorkut. Autoritetet nuk kanë gjetur asnjë shenjë që lë të dyshohet për një vepër penale.

Vincent Pastore fitoi famë botërore falë interpretimit të mikut të ngushtë të Tony Soprano-s, Salvatore “Big Pussy” Bonpensiero, një personazh që më vonë bashkëpunon me FBI-në.

Vdekja e personazhit të tij në sezonin e dytë konsiderohet si një nga momentet më të paharrueshme të serialit, edhe pse aktori vazhdoi të shfaqej në të gjitha gjashtë sezonet përmes skenave rikujtuese. Menaxheri i tij, Robert Attermann, e përshkroi Pastore si një aktor të përkushtuar dhe një njeri me zemër të madhe. “Në sytë e publikut ai do të mbetet gjithmonë ‘Big Pussy’, por për ata që e njihnin ishte shumë më tepër. Ai e donte aktrimin, respektonte kolegët dhe gjithmonë mbështeste aktorët e rinj, duke u dhënë këshilla dhe ndihmë”, tha Attermann.

Ai shtoi se humbja e Pastore është personale për të, pasi për më shumë se tre dekada pati mundësinë të ndiqte nga afër jo vetëm karrierën e tij të suksesshme, por edhe të njihte njeriun e jashtëzakonshëm që ishte.

I lindur në Bronx në vitin 1946, Pastore shërbeu në Marinën Amerikane gjatë Luftës së Vietnamit, përpara se t’i përkushtohej aktrimit.

Karrierën e nisi me role në filma të njohur si “Goodfellas” dhe “Carlito’s Way”, ndërsa më vonë u shfaq edhe në seriale të njohura si “Law & Order”, “General Hospital” dhe “Hawaii Five-O”.

Megjithatë, ishte roli në “The Sopranos” ai që e bëri një nga aktorët më të njohur të televizionit amerikan.

Në vitin 2000, ai dhe pjesa tjetër e kastit të serialit fituan çmimin Screen Actors Guild Award, duke vulosur suksesin e një prej serialeve më të vlerësuara në historinë e televizionit.

Top Channel