Pas muajsh tensionesh, Trump dhe Sanchez shtrëngojnë duart në finalen e Kupës së Botës 2026

Takimi ishte i shkurtër dhe u zhvillua në suitën zyrtare të stadiumit, ku të dy udhëheqësit ndoqën finalen mes Spanjës dhe Argjentinës. Edhe pse nuk pati bisedime zyrtare apo marrëveshje, shtrëngimi i duarve u pa si një sinjal i zbutjes së klimës mes Madridit dhe Uashingtonit.

Në tribunën zyrtare ishte i pranishëm edhe Mbreti Felipe VI, Mbretëresha Letizia, si dhe Princeshat Leonor dhe Sofia, të cilët mbështetën kombëtaren spanjolle.

Marrëdhëniet mes SHBA-së dhe Spanjës janë tensionuar muajt e fundit kryesisht për shkak të mosmarrëveshjeve mbi shpenzimet e mbrojtjes në kuadër të NATO-s. Trump ka kërkuar që vendet anëtare të rrisin shpenzimet në 5% të Prodhimit të Brendshëm Bruto, ndërsa Sanchez e ka cilësuar këtë objektiv si të paarsyeshëm.

Megjithatë, javët e fundit retorika mes dy palëve është zbutur. Trump deklaroi se Spanja kishte rritur ndjeshëm angazhimet e saj në mbrojtje, ndërsa Sanchez ka theksuar se vendi i tij po përmbush detyrimet ndaj aleancës.

Në ceremoninë e ndarjes së trofeut, Donald Trump u prit me fishkëllima nga një pjesë e tifozëve. Presidenti amerikan mori pjesë në dorëzimin e medaljeve, ndërsa në një moment u largua nga podiumi nga presidenti i FIFA-s, Gianni Infantino, për t’i lënë vend festës së ekipit fitues.

Përveç çështjes së mbrojtjes, SHBA-ja dhe Spanja vijojnë të kenë qëndrime të ndryshme edhe për konfliktin në Gaza dhe zhvillimet me Iranin, çështje që kanë ndikuar në marrëdhëniet mes dy vendeve.

Megjithëse takimi në MetLife nuk solli marrëveshje konkrete, ai përbën kontaktin e parë të drejtpërdrejtë mes Trump dhe Sanchez pas një periudhe të gjatë përplasjesh politike dhe shihet si një hap simbolik drejt uljes së tensioneve.

Top Channel