“Kontroll, kërcënime dhe abuzime”/ Rrëfimi tronditës i ish-asistentes së Jeffrey Epstein: Ishte udhëheqësi i një sekti, ai vendoste për…

Gruaja, e cila identifikohet me pseudonimin Anya për të mbrojtur identitetin e saj, tregon se jetoi për disa vite në një nga apartamentet e Epstein në Manhattan, ku strehoheshin disa nga gratë që ai mbante pranë vetes.

Sipas saj, vetëm pak ditë pas vdekjes së Epstein në vitin 2019, vëllai i tij, Mark Epstein, trokiti në derën e apartamentit dhe i kërkoi të largohej. Mark Epstein ka mohuar se kishte dijeni për veprimtarinë kriminale të vëllait të tij.

Anya thotë se edhe sot përpiqet të kuptojë atë që i ndodhi gjatë viteve që kaloi nën ndikimin e financierit.

“Ende po përpiqem të pajtohem me faktin se jam abuzuar për vite me radhë. Nuk isha e lidhur me zinxhirë pas një dere dhe as e mbyllur në një bodrum. Zinxhirët ishin më pak të dukshëm, por ishin aty”, rrëfen ajo.

Sipas saj, Epstein kishte ndërtuar një sistem kontrolli që i mbante gratë të varura prej tij në çdo aspekt të jetës.

“Ai ishte si udhëheqësi i një sekti. Gjithçka sillej rreth tij dhe ai vendoste për çdo gjë”, shprehet Anya.

Ajo tregon se grupi i asistentëve përbëhej nga rreth një duzinë grash, të cilat jetonin në pronat e Epstein, punonin sipas kërkesave të tij dhe, sipas dëshmisë së saj, përballeshin vazhdimisht me abuzime seksuale.

Anya rrëfen se gjithçka nisi kur punonte si modele në Evropë. E lindur në Rusi dhe e rritur në një familje që i kushtonte rëndësi arsimit, ajo kishte ndërtuar një karrierë në industrinë e modës, duke punuar për marka të njohura si Fendi dhe Chanel.

Ajo thotë se u njoh me Epstein përmes skautit të modeleve Daniel Siad, i cili i premtoi se do ta prezantonte me njerëz me ndikim në botën e modës. Në atë kohë, Anya besonte se po i hapej një mundësi e madhe profesionale.

“Më parë pyesja veten se çfarë do të kishte ndodhur po të mos isha futur atë ditë në agjenci. Sot besoj se ishte një kurth i planifikuar. Ishte një konfigurim i plotë”, thotë ajo.

Avokati i Daniel Siad ka mohuar më herët se klienti i tij kishte dijeni për aktivitetet kriminale të Epstein.

Takimi i parë me Epstein u zhvillua në apartamentin e tij në Paris. Anya kujton se nuk u ndje në rrezik, pasi në banesë ndodheshin edhe gra të tjera. Ajo tregon se Epstein i bëri pyetje për jetën personale, familjen, synimet dhe ëndrrat e saj.

“Nuk të bën askush pyetje të tilla në industrinë e modës. Mendova se ai më kuptonte vërtet”, kujton ajo.

Sipas Anyas, ai madje i tha:

“Shoh që je e zgjuar dhe dyshuese. Nuk dua të fle me ty.”

Pikërisht kjo deklaratë, thotë ajo, e bëri të ulte vigjilencën.

“I thosha vetes: ‘Ky njeri është i jashtëzakonshëm. Ai po sheh përtej meje’.”

Anya tregon se për muaj të tërë Epstein e mbajti të lidhur me premtime për kontrata modelingu dhe takime me drejtues të agjencive prestigjioze.  Ndërkohë, ai i kërkonte vazhdimisht fotografi, kontrollonte pamjen e saj fizike dhe e kritikonte për trupin.

“Për gati një vit u stërvita me përkushtim fetar për të arritur trupin që ai kërkonte”, thotë ajo.

Në fund, Epstein i tha se agjencia e njohur Next Management nuk donte ta punësonte sepse nuk ishte “mjaftueshëm e mirë” për tregun amerikan.

Vetëm vite më vonë, pas publikimit të dokumenteve gjyqësore të çështjes Epstein, Anya zbuloi se refuzimi kishte ndodhur shumë më herët dhe se ajo ishte mbajtur qëllimisht me shpresa të rreme.

“Atëherë kuptova se gjithçka kishte qenë një manipulim shumë i sofistikuar. Ai më kishte përgatitur të dështoja”.

Anya rrëfen se pas një takimi me Epstein në Palm Beach, ku ai vuante një dënim të mëparshëm, u përball me abuzim seksual. Ajo thotë se reagimi i njerëzve përreth e bëri të vinte në dyshim perceptimin e saj për atë që kishte ndodhur.

“Mendova se ndoshta nuk kishte ndodhur asgjë e keqe. Ndoshta problemi isha unë. Ndoshta edukimi im ose mënyra si isha rritur më bënte ta shihja situatën gabim”.

Sipas saj, ky ishte një nga mekanizmat që e mbajtën të lidhur për një kohë të gjatë me Epsteinin.

Top Channel