Ka përfunduar seanca në Gjykatën e Posaçme kundër Korrupsionit dhe Krimit të Organizuar për ish-ministrin e Shëndetësisë, Ilir Beqaj, në kuadër të dosjes “Sterilizimi”.
Gazetarja Anila Hoxha raporton se Ilir Beqaj mbërriti në sallën e gjyqit i shoqëruar nga forcat e sigurisë dhe me pranga në duar. Para nisjes së seancës, prangat iu hoqën dhe ai u ul pranë avokatit të tij mbrojtës, Ermal Yzeiraj.
Gjatë seancës, Prokuroria paraqiti qëndrimet e saj për 22 kërkesat e depozituara nga mbrojtja e Beqajt, ndërsa ish-ministri kundërshtoi pretendimet e akuzës, duke deklaruar se i janë cenuar të drejtat procedurale gjatë hetimeve.
Beqaj pretendoi se dokumentet pa firmën e tij nuk mund të përdoren si prova dhe mohoi çdo përgjegjësi për akuzat e ngritura ndaj tij.
Në përfundim, trupi gjykues vendosi që seanca e radhës të zhvillohet më 11 shtator, pasi mbrojtja kërkoi kohë për të shqyrtuar materialet e paraqitura nga Prokuroria.
Beqaj: Faleminderit organit të akuzës për përgjigjet. Fillimisht më duhet të them se organi i akuzës pranoi që, në fazën e hetimeve, m’i ka cenuar hapur të drejtat e mia procedurale. Tre kërkesat e fundit i kam bërë se gjendem në vendimin paraprak; sot unë e kam të vështirë të bëj mbrojtjen.
Në përgjigjet e fundit, organi i akuzës vlerësoi vendimmarrjen e GJSP-së. Ajo është e paankimueshme, por për sa kohë thotë që ka vepruar drejt, do të thotë që vendimi i tyre është ndikuar.
U bënë rreth tre vjet që merrem me këtë çështje. Sot organi i akuzës tregoi që Kodi është i pavlerë. Pavarësinë e tyre e shfrytëzojnë për të shkelur të drejtat procedurale. GJKKO dhe SPAK e hedhin poshtë ligjin e Avokaturës së Shtetit.
Për kallëzimin e Nismës Thurje, organi e pranoi që kallëzimi ishte me pyetje, prandaj duhet të refuzohej.
Organi i akuzës nuk u përgjigj pse m’i ka shkelur të drejtat. Tha që shumë veprime vërtetë nuk janë kryer, por në seancën paraprake janë kërkuar shtesa.
Nuk besoj se ka vjedhje para se të nënshkruhet kontrata. Unë kam bërë kërkesa, por s’kam marrë përgjigje. Organi tha se vjedhja lidhet me veprimet e mia; dhjetëra mijëra faqe nuk kanë lidhje me akuzën. Unë s’kam pranuar asgjë. Një dokument që nuk ka nënshkrimin tim nuk mund të përdoret kundër meje.
Avokati: Kam nevojë për kohë për të lexuar përgjigjet e prokurorisë.
Seanca shtyhet për më 11 shtator.
Top Channel
