New York Knicks kanë fituar titullin kampion të NBA-së për sezonin 2025-26, pasi mposhtën San Antonio Spurs me rezultatin 94-90 në ndeshjen e pestë të finaleve, duke siguruar triumfin 4-1 në serinë finale.
Finalja rezultoi ndër më të balancuarat dhe më konkurrueset e viteve të fundit. Katër fitoret e Knicks erdhën me një diferencë totale prej vetëm 16 pikësh, ndërsa pesë ndeshjet e serisë u vendosën nga gjithsej 20 pikë diferencë, mesatarisht vetëm katër pikë për takim.
Ky është titulli i parë kampion për Knicks që nga viti 1973, duke i dhënë fund një pritjeje 53-vjeçare për tifozët e skuadrës nga Nju Jorku.
Ylli i Knicks, Jalen Brunson, u shpall MVP i finaleve pas një paraqitjeje të jashtëzakonshme në ndeshjen vendimtare. Ai realizoi 45 pikë, përfshirë 15 në periodën e katërt, duke udhëhequr skuadrën drejt përmbysjes dhe fitores së titullit.
Në anën tjetër, qendra e Spurs, Victor Wembanyama, regjistroi 19 pikë, 14 kërcime dhe 5 bllokime, por nuk arriti të shmangte humbjen. Ndërkohë, mbrojtësit titullarë Stephon Castle dhe De’Aaron Fox patën një mbrëmje të vështirë në sulm, me efikasitet të ulët në gjuajtje.
Knicks hynë në çerekun e fundit në disavantazh 72-65, por realizuan një tjetër rikthim spektakolar ndaj Spurs. Vetëm një ndeshje më parë, skuadra e Nju Jorkut kishte vendosur një rekord në finalet e NBA-së me një përmbysje prej 29 pikësh.
Pavarësisht sezonit mbresëlënës të Spurs dhe talentit të madh të Wembanyama, eksperienca, organizimi dhe karakteri i Knicks rezultuan vendimtarë në momentet kyçe të serisë.
Tani, Knicks festojnë një nga sukseset më të rëndësishme në historinë e klubit, ndërsa të gjitha skuadrat e NBA-së do të rikthehen në parket në muajin tetor për nisjen e sezonit të ri dhe garën për titullin e radhës.
Top Channel
