Ambasadori Meidani merr pjesë në debatin mbi zbatimin e Ligjit për gjuhën, bën simbolin e shqiponjës me duar para pjesëmarrësve

Diskutimi u zhvillua në prani të përfaqësuesve të institucioneve, akademikëve dhe trupit diplomatik, duke theksuar rëndësinë e dialogut dhe respektimit të të drejtave gjuhësore si pjesë e shtetit të së drejtës.

Ndërsa ka marrë fjalën ai është shfaqur duke bërë simbolin e shqiponjës me duar para pjesëmarrësve, gjest që u prit me duartrokitje.

“Ndoqa debatin publik “(Mos)zbatimi i Ligjit për Përdorimin e Gjuhëve: Zgjidhjet dhe Pasojat”, organizuar nga Lëvizja Studentore dhe Democracy Lab, me mbështetjen e Ambasadës së Republikës së Shqipërisë, së bashku me kolegë nga trupi diplomatik i akredituar në Shkup.

Ishte një debat konstruktiv dhe i vlefshëm, ku diskutimet me argumente juridike treguan se bëhet fjalë për një të drejtë që buron nga Kushtetuta dhe nga Ligji për Përdorimin e Gjuhëve; një e drejtë që duhet të gjejë zgjidhje të plotë dhe të qëndrueshme.

Falënderoj organizatorët, panelistët, akademikët, analistët dhe studentët për angazhimin e tyre serioz dhe të përgjegjshëm, si dhe përfaqësuesit e trupit diplomatik e veçanërisht mikun tim Ambasadorin Qehaja për angazhimin aktiv në diskutim.

Një dialog i tillë forcon besimin tek angazhimi qytetar dhe i shërben barazisë së të gjithë qytetarëve para ligjit. Ambasada e Republikës së Shqipërisë do të mbetet mbështetëse e çdo dialogu që u shërben proceseve demokratike dhe shtetit të së drejtës”, shkruan ai në një postim në Facebook.