Gjermani Alexander Zverev është shpallur kampion i turneut të Roland Garros 2026, pasi mposhti në finale italianin Flavio Cobolli në një përballje të gjatë dhe shumë të luftuar që zgjati pesë sete.
Në finalen e zhvilluar në Paris, në fushën “Court Philippe Chatrier”, Zverev triumfoi me rezultatin 6-1, 4-6, 6-4, 6-7, 6-1, pas një ndeshjeje që zgjati rreth katër orë e 20 minuta.
Ky është titulli i parë Grand Slam në karrierën e gjermanit, i cili në moshën 29-vjeçare arrin më në fund një triumf në një nga katër turnetë më të mëdhenj të tenisit botëror, pas finales së humbur më herët në US Open 2020 dhe Australian Open 2025.
Pavarësisht humbjes, Cobolli zhvilloi një ndeshje të fortë dhe u paraqit denjësisht në finalen e tij të parë në këtë nivel, duke fituar setin e dytë dhe të katërt dhe duke e çuar sfidën deri në vendosje.
Ndeshja nisi me dominim të Zverev, i cili fitoi bindshëm setin e parë, por Cobolli reagoi në setin e dytë duke rikthyer ekuilibrin. Më pas, të dy lojtarët shkëmbyen momente të forta, me setin e katërt që u vendos në tie-break në favor të italianit.
Në setin final, Zverev mori kontrollin e plotë të lojës, duke shfrytëzuar lodhjen e kundërshtarit dhe duke mbyllur ndeshjen me dy break-e vendimtare.
Top Channel
