Programi/ Një e diel festive për Interin! Nga San Siro në Duomo, zikaltërit do të festojnë Scudetton dhe Kupën e Italisë

Nesër do të jetë një ditë feste për tifozët Nerazzurri: nga San Siro deri në Duomo, një festë pa ndalesë që fillon në drekë dhe do të përfundojë vonë në mbrëmje, duke ngjyrosur Milanon zi e blu.

Sipas njoftimit të klubit në faqen zyrtare www.inter.it, portat e San Siros do të hapen në orën 12:00 dhe tifozët inkurajohen të arrijnë sa më herët për shkak të pjesëmarrjes së madhe.

Shfaqja speciale Inter Live – 21 Herë Kampionë të Italisë do të nisë në orën 12:30.

Në skenë, Daniele Battaglia dhe Elenoire Casalegno do t’u bashkohen 21 miq të Interit nga bota e muzikës, sportit dhe argëtimit. Pika kulmore do të jetë performanca speciale e DJ Benny Benassi, së bashku me muzikë live, përmbajtje ekskluzive dhe angazhim të drejtpërdrejtë të publikut.

San Siro do të jetë qendra e festës, ku kënga, muzika dhe përfshirja kolektive do të dominojnë. Ekipi do të prezantojë trofeun e Kupës së Italisë të fituar në Romë, duke përjetuar përqafimin e tifozëve në një ditë ku kufiri midis fushës dhe tribunave do të bëhet i paqartë.

Një koreografi madhështore në stadium do të mirëpresë kampionët Nerazzurri në fushë në orën 15:00, përpara fillimit të ndeshjes Inter – Hellas Verona. Në fund të ndeshjes, skuadra do të ngrejë Kupën e Scudettos para tifozëve, duke nisur festimin zyrtar. Të dy trofetë e fituar këtë sezon do të jenë gjithashtu në ekspozitë gjatë ceremonisë, duke përfshirë tifozët në kulmin e një viti të jashtëzakonshëm.

Festimet do të vazhdojnë jashtë stadiumit, me paradën e autobusëve të Nerazzurrëve që do të çojnë ekipin te tifozët nëpër qytet. Çdo rrugë, çdo shesh dhe çdo pikë e itinerarit do të shndërrohet në një takim të veçantë mes skuadrës dhe tifozëve. Festimi përfundon në Piazza del Duomo, ku ekipi do të shfaqet në tarracë për të festuar përkrah tifozëve të Interit.

Top Channel