“Shoqëria nuk është imunizuar ndaj ideologjive ekstreme”/ Regjisori i shfaqjes “Drejtësi në Nuremberg”: U nxita nga zhvillimet politike në botë, po jetojmë një nga momentet më apokaliptike të shekullit XX 28/04 14:16
Në shfaqjen “Drejtësi në Nuremberg” në Teatrin Kombëtar, premiera e së cilës shënoi ngjarjen me të rëndësishme artistike të muajit të kaluar, aktori Donald Shehu u dallua me rolin e Rudolf Peterson, një burrë që u kastrua për shkak të të ashtëquajturit Ligji për Parandalimin e Pasardhësve me Sëmundje të Trashëguara, që çoi në sterilizime të detyruara për qindra mijëra njerëz që konsideroheshin “të papërshtatshëm”.
“E kam ndjerë nga publiku se si është pritur për vetë biografinë e atij personazhi, për mënyrën se si jeta e Rudolf Peterson ka shkuar që në moshën 6-vjeçare, si e kanë keqtrajtuar për faktin se ishte pjesë e një partie komuniste. Derisa arriti në momentin e sterilizimit, që ishte pika që e ndryshoi tërësisht si njeri. Ardhja e tij në gjyq është një moment delikat, duke marrë parasysh që ka një lloj përhumbjeje. Për mua nuk ka qenë e lehtë, më është dashur një periudhë përgatitore një orë para shfaqjes, më duhej të përgatitesha për të hyrë në atë personazh, që pavarësisht se është i shkurtër, ka një dinamikë shumë të madhe“, shprehet aktori në një intervistë për “Exclusive”.
Rudolfit iu këput jeta. Në terrorin nazist, një metodë e dhunës së tyre ishte sterilizimi…
“Dhe të mos kesh mundësinë për të bërë fëmijë është një fatkeqësi shumë e madhe. Është edhe ana mendore që ai e përjetoi, sepse edhe prindërit iu larguan nga jeta. Nëna e tij ka vdekur nga zemra, pavarësisht se nazistët dyshojnë se ka pasur probleme mendore. Sistemi e bëri që të mos ishte më njeri“, shton aktori.
Rodolf Peterson e kishte përjetuar nën lëkurë dhunën shtetërore. Portretizmi që i bëri këtij personazhi Donald Shehu rrëqethi publikun në skenën e Teatrit Kombëtar. Aktori i ri pranon se Rudolfi është një nga rolet më të mira të karrierës, ndërsa tregon se regjisori Arben Kumbaro, profesori i tij në universitet, i zbuloi talentin dhe e ngjiti në skenën e teatrit.
“Pas çdo shfaqjeje ka pasur shumë duartrokitje, edhe pas mbarimit të skenës sime. Jam ndjerë shumë i vlerësuar, është shfaqja ime e parë ku marr një emocion kaq të madh. Janë si rezultat i punës që kemi bërë me regjisorin. Mund të jetë një nga rolet e mia më të rëndësishme në teatër dhe më të ndjeshme“.
Top Channel
