Kufijtë njerëzorë janë ndërtuar për t’u testuar, por ajo që ndodhi këtë të dielë në rrugët e Londrës kalon çdo parashikim sportiv.
Keniani 30-vjeçar Sabastian Sawe nuk fitoi thjesht një garë, por kaloi në një dimension të ri duke u bërë atleti i parë në histori që thyen barrierën mitike të dy orëve në një maratonë zyrtare. Duke ndalur kronometrin në 1 orë, 59 minuta dhe 30 sekonda, ai shkërmoqi me 65 sekonda rekordin e mëparshëm të mbajtur nga i ndjeri Kelvin Kiptum, duke e kthyer këtë edicion në një ngjarje monumentale për atletikën botërore.
I pari që mundi të përfundojë një maratonë nën 1h59′ ishte keniani Eliud Kipchoge në 2019, gjatë projektit “Ineos159”, një “garë” e mbyllur për publikun e gjerë dhe kësisoj e pavlefshme për rekord botëror, realizuar në parkun Pratter të Vjenës, e financuar nga miliarderi britanik Jim Ratcliffe, pronar i kompanisë petrolifere INEOS, në bashkëpunim me Nike
Ndryshe nga eksperimentet e mëparshme të zhvilluara në kushte laboratorike të kontrolluara, arritja e Sawe erdhi në kushte reale gare dhe u ndërtua mbi një strategji taktike dhe fizike të përsosur. Treguesi më mbresëlënës i këtij suksesi ishte ritmi i tij në gjysmën e dytë të trasesë, të cilën e përshkoi ndjeshëm më shpejt se të parën. Megjithatë, ky rekord i jashtëzakonshëm nuk do të ishte i mundur pa presionin e vazhdueshëm të etiopianit Yomif Kejelcha. Të dy vrapuesit e kthyen pjesën e fundit të garës në një betejë epike nervash dhe rezistence, e cila e detyroi edhe Kejelchan të kalonte murin historik me kohën 1:59:41. Në çdo ditë tjetër, ky rezultat do ta bënte atë një hero absolut, por këtë herë e rendit si bashkë-protagonist të garës më të madhe të të gjitha kohërave, ndërsa podiumi u plotësua nga ugandezi Jacob Kiplimo.
Për të plotësuar panoramën e një dite të paprecedentë në kryeqytetin britanik, atletja etiopiane Tigst Assefa konfirmoi dominimin e saj absolut në elitën e femrave. Ajo triumfoi me kohën 2:15:41, duke thyer rekordin e mëparshëm botëror për garat ekskluzivisht për gra dhe duke mbrojtur me sukses titullin e saj. Edicioni i këtij viti i Maratonës së Londrës dëshmoi përfundimisht se inxhinieria e trupit të njeriut dhe vullneti sportiv ende nuk e kanë thënë fjalën e tyre të fundit, duke i hapur rrugë një epoke të re.
Top Channel
