Lojtarët e Serisë A shpenzuan të paktën 200 mijë euro për alkool, eskorta dhe lëndë të ndaluara, detajet e reja nga skandali në Itali

Tani po bëhet kërkimi për llogaritë e të arrestuarve me akuzën e drejtimit të rrjetit të prostitucionit. Një pjesë e parave thuhet se është transferuar në Liban.

Seancat e para dëgjimore të dëshmitarëve kanë filluar tashmë, kryesisht me vajza që frekuentonin futbollistët, të cilat iu drejtuan agjencisë Ma.De. për të organizuar mbrëmje në klubet e jetës së natës në Milano, të cilat ndonjëherë përfundonin në një dhomë hoteli në shoqërinë e eskortave që paguheshin deri në një mijë euro nata.

Këtu fillojnë zhvillimet e hetimit të Milanos, i cili çoi në arrest shtëpiak të katër personave, përfshirë Deborah Ronchi, pronare e agjencisë së eventeve Ma.De., dhe partnerit të saj Emanuele Buttini, të akuzuar si promotorë të një organizate kriminale që synonte ndihmën, inkurajimin dhe shfrytëzimin e prostitucionit dhe krimeve të tjera si pastrimi i parave.

Hapi tjetër i hetuesve do të jetë ndjekja e të gjitha flukseve të parave që sollën mbi 1.2 milion euro në arkën e grupit kriminal në më pak se dy vjet “operacion” me bazë në selinë e Cinisello Balsamo. Të paktën 200 mijë euro u paguan nëpërmjet transfertave bankare nga lojtarët që përdorën shërbimet “gjithëpërfshirëse” të Ma.De., shpesh pasi luanin në “San Siro”.

Lojtarë nga ekipet e Serie A, përfshirë Interin, Milanin, Juventusin, Torinon, Sassuolon dhe Veronën janë gjithashtu të përfshirë. Asnjëri prej tyre nuk është nën hetim, as lojtarët apo pronarët e 26 klubeve ku u mbajtën festat pas ndeshjes.

Dokumentet rendisin afërsisht shtatëdhjetë emra futbollistësh, të cilët u përdorën nga hetuesit, të udhëhequr nga zv.hetuesja Bruna Albertini, si çelësa kërkimi për të kontrolluar kartat e memories së telefonave celularë të sekuestruar nga të dyshuarit. Kjo u bë për të verifikuar lidhjet midis organizatës, atletëve dhe vajzave që dyshohet se prostituoheshin, midis moshës 19 dhe 21 vjeç.

Aktualisht, dokumentet zbulojnë vetëm kontakt të drejtpërdrejtë midis këtij grupi të vogël shoqëruesish dhe katër ose pesë futbollistëve që paguan për marrëdhënie seksuale. Edhe ata do të merren në pyetje si dëshmitarë në ditët në vijim.

Corriere della Sera ka vendosur të mos i publikojë emrat e atleteve dhe vajzave për të respektuar privatësinë e tyre, të paktën derisa të zbulohet përfshirja e tyre e drejtpërdrejtë në aktivitetet e paligjshme të rrjetit të supozuar të prostitucionit dhe ndihmës e inkurajimit për të cilin akuzohen gjashtë të dyshuarit.

Guardia di Finanza ka gjurmuar tashmë rrjedhën e fondeve në arkën e kompanisë Ma.De., duke përfshirë afërsisht 200 mijë euro të paguara nëpërmjet transfertave bankare nga futbollistët pas festave të mbushura me vodka dhe shampanjë, me një kosto deri në 3,500 euro secila.

Hetuesit duhet të përcaktojnë se cilat pagesa lidhen me shërbimet e eskortave, të cilat i paguanin organizatës 50% të të ardhurave të tyre. Hetimi zbuloi gjithashtu se një pjesë e fitimeve të dyshuara të paligjshme mund të ketë përfunduar në llogaritë bankare lituaneze dhe më pas të jetë transferuar diku tjetër.

Top Channel