Emin Kokalari është vënë nën hetim pasi sipas policisë shpërndau indormacione të rreme në rrjete sociale për aludimet se zyrtarë të bashkisë Gjirokastër janë infektuar me HIV/AIDS.
“Procedohet penalisht një 33-vjeçar, pasi dyshohet se ka përhapur informacione të rreme në rrjetet sociale, duke shkaktuar panik te qytetarët, me pretendimin se kryetari i bashkisë dhe punonjës të bashkisë janë të infektuar me HIV/AIDS.
Specialistët për Hetimin e Krimeve në Komisariatin e Policisë Gjirokastër referuan materialet në Prokurori, ku nisi procedimi penal për shtetasin E. K., 33 vjeç, banues në Gjirokastër, për veprën penale “Përhapja e informatave të rreme që ngjallin panik”. Në cilësinë e provës materiale u sekuestrua celulari i 33-vjeçarit”, thuhet në njoftimin e policisë.
Qytetarët e Gjirokastrës janë përballur ditët e fundit me një valë paniku, pas përhapjes së lajmeve në rrjetet sociale mbi një situatë të pretenduar të përhapjes së HIV/AIDS.
Në qendër të këtyre aludimeve janë vendosur kryetari i bashkisë dhe disa punonjës të institucionit, çka ka rritur më tej shqetësimin në opinionin publik.
Menjëherë pas publikimit të këtyre pretendimeve, avokati i kryebashkiakut të Gjirokastrës, Arben Llangozi, i është drejtuar Drejtorisë Vendore të Policisë, ku ka depozituar një kallëzim penal, duke i cilësuar këto lajme si shpifje dhe të pavërteta që dëmtojnë imazhin e personave të përfshirë, raporton korrespondentja e Top Channel, Entjola Budo.
Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
Top Channel
