Presidenti i Serbisë, Aleksandar Vuçiç, tha në një postim në rrjetet sociale se vendi i tij po përballet me presione të ndryshme politike nga rajoni, duke përmendur në mënyrë direkte Prishtinën, Tiranën dhe Zagrebin, dhe paralajmëroi blerje të reja ushtarake.
Ai shtoi se, pavarësisht këtyre zhvillimeve, institucionet serbe do të vazhdojnë punën për forcimin e shtetit dhe mbrojtjen e interesave kombëtare në rajon. Si komandant suprem i Forcave të Armatosura Serbe, tha se ka propozuar miratimin e një strategjie për robotizimin e këtyre forcave.
“Si Komandant i Përgjithshëm i Ushtrisë së Serbisë, sot propozova hartimin dhe miratimin e një strategjie robotike, krijimin e një njësie të nivelit batalion të pajisur me platforma robotike, kryerjen e përgatitjeve organizative për formimin e divizioneve dhe batalioneve të dronëve sulmues me rreze të gjatë veprimi dhe municioneve bredhëse, trajnimin e njësive speciale të zbulimit për përcaktimin e koordinatave të objektivave për drejtimin e artilerisë dhe zjarrit të aviacionit, si dhe pajisje dhe trajnim të mëtejshëm për përdorimin e dronëve në njësitë e tjera.
U kërkova oficerëve që, në këtë periudhë revolucionare ndryshimesh në ushtrinë tonë, me entuziazëm të madh dhe përkushtim edhe më të madh, të marrin pjesë në digjitalizimin dhe robotizimin e ushtrisë sonë, duke përdorur raketat më të fuqishme dhe më moderne.
Situata e sigurisë është disi më komplekse sesa në janar kur e trajtuam atë, kryesisht për shkak të operacioneve dhe aktiviteteve të mëtejshme të aleancës ushtarake të Prishtinës, Tiranës dhe Zagrebit. Vendosmëria jonë për të ruajtur paqen dhe stabilitetin nuk ka ndryshuar, dhe këtë mund ta ruajmë vetëm nëse jemi të fortë dhe mjaftueshëm të fuqishëm.
Në ditët në vijim do të nënshkruajmë kontrata shumë të rëndësishme për prokurimin e armëve dhe pajisjeve ushtarake. Presim vizita të rëndësishme dhe kontrata të reja me vende të tjera, me qëllim realizimin e porosive të mëdha për ushtrinë tonë. Besoj se në periudhën që vjen do ta çojmë në një nivel më të lartë gjithçka për të cilën folëm sot. Do të vazhdojmë të zhvillohemi në të gjitha fushat. Mendoj se do të jemi një nga ushtritë me ndërveprueshmërinë më të madhe dhe kapacitetet më të larta jo vetëm në rajonin tonë, por edhe më gjerë.
Jam gjithashtu mirënjohës ndaj udhëheqjes së Republikës Srpska, e cila sot pati mundësinë të shqyrtojë me ne një kërcënim të mundshëm për sigurinë e vendit tonë, paqen dhe stabilitetin rajonal, si dhe gjendjen e fuqisë sonë ushtarake, mbrojtjes dhe kapaciteteve që ende duhet t’i sigurojmë për t’i avancuar më tej këto aftësi”, ka deklaruar Presidenti Vuçiç.
Top Channel
