Bayern Munich vijon marshimin drejt titullit në Bundesliga, pasi mposhti bindshëm St. Pauli me rezultatin e thellë 5-0 në transfertë.
Skuadra bavareze dominoi takimin dhe arriti një moment historik, duke kaluar shifrën e 101 golave në kampionat – rekord që kishte mbetur në fuqi që nga sezoni 1971/72.
Ndeshja u zhbllokua shpejt, kur Jamal Musiala realizoi me kokë pas një asistimi të saktë nga Konrad Laimer. Bayern vazhdoi të kontrollojë lojën, por pjesa e parë u mbyll vetëm me një gol diferencë, pavarësisht rasteve të shumta.
Në fraksionin e dytë, gjithçka u bë më e lehtë për miqtë. Leon Goretzka dyfishoi shifrat pas një goditjeje standarde, ndërsa më pas Michael Olise shtoi golin e tretë me një goditje të bukur nga distanca.
Bayern nuk u ndal me kaq – Nicolas Jackson realizoi golin e katërt, ndërsa në fund ishte Raphaël Guerreiro që vulosi “manitën” 5-0.
Me këtë fitore, Bayern regjistron ndeshjen e 10-të radhazi pa humbje në kampionat dhe konfirmon formën e shkëlqyer, ndërsa St. Pauli vazhdon serinë negative pa fitore.
Top Channel
