Komisionerja e BE-së për Zgjerim, Marta Kos është shprehur skeptike në lidhje me propozimin e Aleksandar Vuçiçit dhe Edi Ramës, të cilët bënë thirrje për përshpejtimin e integrimit të vendeve kandidate në tregun e përbashkët të BE-së dhe në hapësirën Shengen, pa marrë të drejtën e vetos.
Sipas një artikulli të Politico, komisionerja e BE-së për zgjerim ka deklaruar se nuk është e sigurt nëse Aleksandar Vuçiçi dhe Edi Rama e dinë se sa duhet të arrijnë nëse duan të jenë pjesë e Shengenit.
“Nuk jam e sigurt nëse Vuçiç dhe Rama e dinë sa duhet të arrijnë nëse duan të jenë pjesë e Shengenit apo të tregut të përbashkët dhe se procesi i reformave është i vështirë si për integrimin ekonomik, ashtu edhe për anëtarësimin në BE”, ka thënë Kos.
Por nga ana tjetër ajo tha se BE duhet të ndryshojë rregullat e saj për të mundësuar një valë të re vendesh që t’i bashkohen, duke u bërë thirrje kryeqyteteve të paraqesin planet e tyre pasi hodhën poshtë propozimet e Komisionit për të përmirësuar procesin.
Kos, tha se krahu ekzekutiv i BE-së u kishte paraqitur tashmë tre opsione vendeve dhe “pa vendimin e shteteve anëtare, nuk mund të ecim përpara”, duke folur në Samitin e Evropës Konkurruese.
Këto tre opsione përfshijnë ruajtjen e status quo-së, ndryshimin e sistemit aktual për të siguruar që vendet kandidate të mos vuajnë për vite me radhë, ose propozimin e kundërt të zgjerimit të paraqitur nga Presidentja e Komisionit Ursula von der Leyen dhe ekipi i saj, ku aplikantët do të bashkoheshin përpara se të përfundonin reformat kryesore.
Procesi i pranimit është komplikuar nga refuzimi i vazhdueshëm i kryeministrit hungarez Viktor Orbán për të siguruar mbështetjen unanime të nevojshme që Ukraina të vazhdojë me kandidaturën e saj.
Zgjerimi i kundërt u parashikua nga Brukseli si një mënyrë që Kievi dhe të tjerët të fillonin të merrnin akses në tregun e vetëm dhe skemat e investimeve përpara se të bëheshin anëtare të plota të BE-së.
“Nga shkëmbimi i parë me shtetet anëtare opsioni numër tre nuk është në rregull… ky do të ishte një revolucion”, tha Kos duke shtuar se “opsioni numër një, status quo-ja, gjithashtu nuk është një opsion”.
Top Channel
