Vrasja e dy zyrtarëve të lartë iranianë/ Teherani “pushtohet” nga turma njerëzish, qytetarët nderojnë liderët e rënë 18/03 18:24
Prokuroria në Norvegji ka kërkuar një dënim me shtatë vjet e shtatë muaj burg për Marius Borg Hoiby, djalin e Princeshës së Kurorës Mette-Marit, i cili po gjykohet për një sërë akuzash të rënda, përfshirë përdhunim dhe dhunë.
Sipas prokurorëve, 29-vjeçari duhet të shpallet fajtor për 39 nga 40 akuzat me të cilat përballet. Ai mohon akuzat më të rënda, përfshirë katër raste përdhunimi dhe një akuzë për sulm të rëndë.
Gjyqi, i cili zhvillohet në Gjykata e Distriktit të Oslos, ka nisur në fillim të shkurtit dhe pritet të përfundojë këtë javë. Pas përfundimit të seancave, trupi gjykues do të tërhiqet për të marrë vendimin.
Hoiby ishte i pranishëm në seancën e së mërkurës, kur prokuroria përmbylli paraqitjen e saj. Ai ka lindur përpara martesës së nënës së tij me princin e kurorës në vitin 2001 dhe është rritur brenda familjes mbretërore, pa qenë zyrtarisht anëtar i saj.
I pandehuri ka deklaruar se marrëdhëniet seksuale me katër gratë në fjalë kanë qenë me pëlqim, duke mohuar akuzat për përdhunim. Ndërkohë, ai është deklaruar fajtor për disa vepra më të lehta, përfshirë shkelje të ligjit për drogën, rregullave të trafikut dhe një urdhri mbrojtës.
Ai gjithashtu ka pranuar pjesërisht një akuzë për sulm të rëndë ndaj një gruaje në apartamentin e saj, por ka mohuar akuzat për abuzim ndaj ish-partneres së tij, Nora Haukland.
Gjyqi ka zgjatur pothuajse shtatë javë dhe ka tërhequr vëmendje të madhe mediatike në Norvegji. Gjatë dëshmisë së tij, Hoiby u shpreh për presionin e madh publik, duke deklaruar: Unë nuk jam më Marius, jam një përbindësh.
Në të njëjtën kohë, çështja ka rikthyer në vëmendje edhe Princeshën e Kurorës, për shkak të raportimeve mbi kontaktet e saj në të kaluarën me financierin e ndjerë Jeffrey Epstein.
Prokurori i shtetit, Sturla Henriksbo, theksoi se i pandehuri nuk duhet gjykuar për perceptimin publik, por për veprimet e tij konkrete. Ai kërkoi që tre nga akuzat për përdhunim të dënohen me nga dy vjet burg secila, ndërsa një tjetër me tre vjet.
Sipas prokurorisë, në të katër rastet e pretenduara, viktimat ishin në gjumë ose të paafta për të reaguar. Në tre prej rasteve, policia ka gjetur edhe video që dyshohet se janë realizuar pa pëlqimin e grave.
Prokuroria theksoi se fakti që marrëdhënie të mëparshme konsensuale mund të kenë ekzistuar nuk ka rëndësi për çështjen, duke nënvizuar se akuzat për përdhunim dhe dhunë në marrëdhënie intime janë ndër veprat më të rënda penale.
“Përdhunimi mund të lërë pasoja të përhershme dhe të shkatërrojë jetë”, deklaroi prokurori.
Ndërkohë, mbrojtja ka kundërshtuar akuzat më të rënda, ndërsa ekspertët ligjorë parashikojnë se Hoiby mund të marrë një dënim më të ulët për veprat që ka pranuar.
Mes tyre përfshihet edhe transportimi i 3.5 kilogramëve marihuanë, si dhe shkelje të tjera si drejtim i pakujdesshëm dhe pa leje të vlefshme. Vetëm akuza për drogë mund të dënohet deri në 11 muaj burg.
Top Channel
