Bayerni i Mynihut frenon vrullin e tij në Bundesligën gjermane. Skuadra e drejtuar nga Vincent Kompany doli nga BayArena nga ndeshja me Bayer Leverkusen me 1 pikë pasi barazoi 1-1, një rezultat që konsiderohet i mirë duke parë si rrodhën ngjarjet.
Bayer Leverkusen e nisi në mënyrë perfektë ndeshjen teksa që në minutën e 6 mori avantazhin në 1-0 me golin e Alex Garcia. Pak para fundit të pjesës së parë, Bayerni i Mynihut e pa veten në inferioritet numerik pasi Nicolas Jackson u ndëshkua me karton të kuq dhe skuadrat shkuan në pushimin e ndeshjes me avantazhin 1-0 të Leverkusen. Pritej që skuadra e aspirinave të përfitonte nga superioriteti numerik në pjesën e dytë, por Bayerni i Mynihut shënoi golin e barazimit me Luis Diaz në 1-1. Kolumbiani më vonë, pikërisht në minutën e 84 u bë protagonist në aspektin negativ për skuadrën bavareze pasi u ndëshkua me karton të kuq me kampionët e Gjermanisë që mbetën me 9 futbollistë. Gjithsesi rezultati nuk ndryshoi më dhe mbeti 1-1 me Bayernin që shkon në 67 pikë dhe diferenca me Borussia Dortmund bie në 9 pikë.
Skuadra verdhezi nuk gaboi në ndeshjen e saj dhe në Signal Iduna Park mundi Augsburg me rezultatin 2-0. Karim Adeyemi zhbllokoi rezultatin në minutën e 13 për skuadrën e drejtuar nga Nico Kovac, ndërsa në pjesën e dytë, Luca Reggiani dyfishoi shifrat në 2-0 me Borussia Dortmund që mori 3 pikë shumë të vlefshme.
Rezultatet në Bundesligë
Bayer Leverkusen-Bayern München 1-1
Borussia Dortmund-Augsburg 2-0
Eintracht Frankfurt-Heidenheim 1-0
Hoffenheim-Wolfsburg 1-1
Top Channel
