LIVE/ NATO shkatërron një tjetër raketë iraniane mbi Turqi, djali i Khameneit zyrtarisht lideri i ri suprem i Iranit, Trump: Asnjë udhëheqës nuk e ka të gjatë pa miratimin tim 09/03 17:44
Presidenti i Libanit, Joseph Aoun, ka bërë thirrje për negociata të drejtpërdrejta me Izraelin dhe për një armëpushim të menjëhershëm, me qëllim ndalimin e “të gjitha agresioneve tokësore, ajrore dhe detare izraelite kundër Libanit”, sipas një deklarate të publikuar të hënën nga presidenca libaneze.
Kreu i shtetit kërkoi gjithashtu më shumë mbështetje logjistike për forcat e armatosura të vendit, për të forcuar përpjekjet e tyre në çarmatimin e grupit militant Hezbollah.
“Njëkohësisht, Libani dhe Izraeli duhet të nisin negociata të drejtpërdrejta për të zbatuar planin e përmendur më sipër,” thuhet në deklaratën e presidentit.
Duke iu referuar sulmeve fillestare me raketa nga Hezbollah, presidenca libaneze shtoi: “Kushdo që lëshoi raketat synonte të blinte rrënimin e libanezëve përmes një sulmi dhe kaosi, edhe nëse kjo do të sillte shkatërrimin e dhjetëra fshatrave tanë dhe zhvendosjen e qindra mijëra njerëzve, të gjitha për llogaritjet e regjimit iranian.”
Këto deklarata konsiderohen si një nga kritikat më të forta dhe më të drejtpërdrejta ndaj Hezbollahut nga një lider libanez deri më sot.
Sipas Ministrisë së Shëndetësisë së Libanit, të paktën 394 persona janë vrarë në vend që kur Izraeli nisi sulmet ajrore ndaj Libanit në fillim të kësaj jave. Izraeli ka deklaruar se operacionet ushtarake kundër fqinjit të tij verior synojnë eliminimin e Hezbollahut, i cili mbështetet nga Irani.
Top Channel
