LIVE/ Lufta në Lindjen e Mesme, Izraeli sulmon objektet e naftës në Teheran, Irani raporton për katër të vdekur, viktima edhe në sulmin në Liban, Trump: S’kemi nevojë për Starmer 08/03 08:35
Ngjarjet e fundit në Lindjen e Mesme dhe përshkallëzimi i konfliktit që përfshin Iranin mund të kenë shtuar shqetësimet në Phenian për sigurinë e udhëheqjes së Koresë së Veriut.
Analistët vlerësojnë se udhëheqësi i Koresë së Veriut, Kim Jong Un, mund të jetë duke shqyrtuar mundësinë e rifillimit të bisedimeve me presidentin amerikan Donald Trump.
Media shtetërore e Koresë së Veriut dënoi Shtetet e Bashkuara dhe Izraelin për atë që e quajti “luftë agresioni” kundër Iranit, por nuk raportoi për vdekjen e liderit suprem iranian Ali Khamenei. Sipas analistëve, ky qëndrim lidhet me mënyrën se si sistemi politik i Koresë së Veriut është ndërtuar rreth figurës pothuajse të paprekshme të udhëheqësit të saj. Pranimi publik i eliminimit të një lideri suprem në një shtet tjetër do të krijonte një precedent të rrezikshëm për propagandën e brendshme.
Eksperti Chad O’Carroll nga Korea Risk Group thotë se Kim mund të ketë interes të angazhohet në një formë dialogu me Trump këtë vit, edhe nëse bisedimet do të ishin vetëm simbolike. Sipas tij, qëllimi kryesor do të ishte menaxhimi i paparashikueshmërisë së politikës së jashtme të presidentit amerikan.
Në Phenian, strukturat e sigurisë po analizojnë me kujdes operacionet ushtarake amerikane dhe zhvillimet në Lindjen e Mesme, ndërsa përpiqen të sigurojnë që lideri i tyre të mos përballet me një fat të ngjashëm me atë të udhëheqësve të tjerë të rrëzuar ose të eliminuar.
Ndërkohë, Koreja e Veriut vazhdon të demonstrojë fuqinë e saj ushtarake. Së fundmi, Kim mbikëqyri një provë të një rakete lundrimi nga shkatërruesi i ri “Choe Hyon”, ndërsa analistët nuk përjashtojnë që testime të tilla të lidhen me tensionet globale.
Ekspertët theksojnë se Pheniani ka ndërtuar ndër vite një nga sistemet më të forta të mbrojtjes së udhëheqjes në botë, me masa sigurie të shumta, objekte nëntokësore dhe taktika të ndryshme për të mbrojtur liderin e vendit.
Megjithatë, prania e armëve bërthamore mbetet faktori kryesor që ndryshon ekuilibrin strategjik. Besohet gjerësisht se Koreja e Veriut zotëron dhjetëra koka bërthamore dhe sisteme raketore që mund të arrijnë territorin amerikan, një realitet që e bën çdo përballje ushtarake shumë më të rrezikshme.
Marrëdhëniet mes Kim dhe Trump kanë qenë të pazakonta në diplomacinë ndërkombëtare. Dy liderët u takuan disa herë gjatë mandatit të parë të Trump, përfshirë samitet në Singapor dhe Hanoi, si dhe takimin historik në zonën e demilitarizuar koreane në vitin 2019.
Megjithatë, bisedimet për çarmatimin bërthamor përfunduan pa marrëveshje dhe dialogu mes dy vendeve u zbeh në vitet që pasuan.
Së fundmi, Kim ka lënë të hapur një mundësi të kufizuar për dialog me SHBA-në, por ka theksuar se çdo normalizim i marrëdhënieve duhet të përfshijë njohjen e Koresë së Veriut si një shtet me armë bërthamore.
Ndërkohë, Uashingtoni ka deklaruar se mbetet i hapur për dialog pa parakushte. Për momentin nuk ka sinjale konkrete për rifillimin e bisedimeve, por zhvillimet globale mund ta shtyjnë Phenianin të rishqyrtojë strategjinë e tij diplomatike.
Top Channel
