Lionel Messi fiton një pagë vjetore midis 60 dhe 70 milionë eurosh tek Inter Miami, një shumë që përfshin pagën si lojtar dhe të drejtat e pjesëmarrjes në aksionet e klubit. Kjo u bë e ditur nga pronari i klubit, Jorge Mas.
Messi, 38 vjeç, nënshkroi vitin e kaluar një kontratë trevjeçare që do ta mbajë të lidhur me klubin deri në moshën 40 vjeç. Edhe pse detajet e plota të marrëveshjes nuk janë publikuar, pritet që Messi të bëhet aksionar i klubit pas përfundimit të karrierës, një kusht i negociuar që kur mbërriti tek Inter Miami.
Për të mbuluar shpenzimet e ‘yjeve’ si Luis Suárez dhe Rodrigo De Paul, Inter Miami mbështetet kryesisht te sponsorët dhe marrëveshjet komerciale, të cilat përbëjnë rreth 55% të të ardhurave totale të klubit. Ndërkohë, të drejtat televizive përbëjnë vetëm 2%, sipas Mas.
“Arsyeja pse më duhen sponsorë, dhe që ata të jenë të klasit botëror, është se lojtarët janë të shtrenjtë. I jap Messit, dhe çdo cent ia vlen, por kjo kushton midis 60 dhe 70 milionë eurosh në vit, duke llogaritur gjithçka,” deklaroi Jorge Mas në një intervistë të fundit.
Ky shifër e vendos Messin si futbollistin e dytë më të paguar në botë, pas Cristiano Ronaldos, i cili fiton mbi 300 milionë euro në kontratën me Al Nassr.
Investimi ka dhënë tashmë rezultate sportive, pasi Inter Miami fitoi MLS-në për herë të parë sezonin e kaluar, një arritje e festuar edhe në Shtëpia e Bardhë me presidentin Donald Trump. Vlera e klubit gjithashtu është rritur, duke arritur 1,25 miliardë euro në 2025, një rritje prej 22%, duke e bërë simbolin më të vlefshëm të kampionatit amerikan.
Jorge Mas këshillon klubet e tjera të fokusohen më shumë te marrëveshjet e markës sesa te të ardhurat nga të drejtat e transmetimit: “Përdorni këtë ekosistem për sponsorët që bashkëpunojnë me ekipet tuaja dhe për të krijuar vlerë. Njerëzit nuk e mendojnë kështu, unë mendoj. Vlerësimi i ekipit bazohet mbi këtë.”
Një nga marrëveshjet më të fundit ishte partneriteti me brazilianët e Nu Holdings, që do t’ japin emrin stadiumit të ri, i cili do të inaugurohet në prill, dhe logotipi i tij do të shfaqet në pjesën e pasme të fanellave nga gushti.
Duke pasur parasysh sfidat e së ardhmes dhe rënien eventuale të “Messimanisë”, Jorge Mas është i përgatitur për të vazhduar me inovacionin: “Unë transformova MLS-në. Disa kritikojnë, të tjerët lavdërojnë. Unë drejtoj sepse besoj se duhet të ndryshojmë shumë gjëra. Nuk mund të kesh frikë nga ndryshimi. Për të lulëzuar dhe për të pasur sukses, duhet të veprosh ndryshe.”
Top Channel
