Manchester City, Atletico de Madrid dhe tani Inter Milan me Yann Sommer dhe Manuel Akanji… Në pak më shumë se një muaj, të gjithë humbën kundër Bodö/Glimt, një klub i vogël norvegjez i vendosur mbi Rrethin Arktik i cili luan, pa asnjë yll të madh ndërkombëtar, në një stadium të hapur të ekspozuar ndaj të ftohtit.
Këto rezultate i tejkalojnë pritjet. Bodö është një qytet i vogël bregdetar në Arktik me vetëm 50,000 banorë, një vend që shumë do ta kishin të vështirë ta gjenin në hartë. Në këtë vend të largët, të goditur nga erërat e akullta të detit dhe të zhytur në errësirë në dimër, Bodö/Glimt (“glimt” do të thotë “shkëlqim” në norvegjisht) e mban flakën gjallë.
Në stadiumin e tij të ngushtë dhe të modës së vjetër në Aspmyra – i ndërtuar në vitin 1966, mezi mund të akomodojë pak më shumë se 8,000 spektatorë, ekipi që ishte pranë falimentimit në vitin 2016 dhe që përbëhet pothuajse tërësisht nga norvegjezë ka bërë mrekulli që nga rikthimi i tij në Eliteserien, divizioni i parë norvegjez, në vitin 2018. Në vitet e fundit, ka fituar katër kampionate dhe ka arritur në gjysmëfinalet e Europa League vitin e kaluar.
Pasi kishin fituar në shtëpi (3-1) në ndeshjen e parë, skandinavët me të verdhë e të zinj përmbysën (2-1) në shtëpi të martën në mbrëmje, në ndeshjen play-off të Ligës së Kampionëve, italianët e Interit, finalistë të garës në vitet 2023 dhe 2025 dhe liderë të padiskutueshëm aktualë të Serie A.
Një arritje e re që i lejon Bodö/Glimt të sigurojë një vend në raundin e 16-të të turneut më prestigjioz të klubeve në botë dhe ku shorti këtë të premte e përballi për takimin e rradhës me portugezët e Sportingut të Lisbonës. “Kjo është performanca më e madhe e të gjitha kohërave për një ekip norvegjez”, deklaroi trajneri i ekipit përfaqësues, Stale Solbakken, për transmetuesin NRK.
Bodø/Glimt ka fituar tashmë rreth 52.5 milionë euro në sezonin 2025/26, duke përjashtuar të ardhurat nga dita e ndeshjes. Me një tjetër ndeshje të madhe në shtëpi për ndeshjet eliminatore, të ardhurat totale mund të kalojnë 70 milionë euro, dyfishi i asaj që klubi shpenzoi në të gjithë vitin financiar 2024 para këtij suksesi evropian. Liga e Kampionëve nuk ka ndryshuar vetëm rezultatet e tyre. Ajo i ka ndryshuar edhe ekonominë e tyre.
Top Channel
