Rregulla të reja udhëtimi në Mbretërinë e Bashkuar, sfida për personat me shtetësi të dyfishtë, ja çfarë ndryshon 25/02 11:30
Autoritetet spanjolle po punojnë për prishjen e Hotel Añaza të braktisur në Tenerife, i njohur në vend si ” Hoteli Fantazmë”, duke i dhënë fund një vonese që ka zgjatur më shumë se pesë dekada.
Sipas Daily Mail, ndërtesa 22-katëshe që dominon bregdetin e Acoran, në jug të Santa Cruz në Tenerife, do të prishet me një kosto të vlerësuar prej 2.3 milionë eurosh, një shumë që do të mbulohet nga fondet publike.
Siç kujton gazeta britanike, ndërtesa në formë Y u ndërtua në vitin 1973 me qëllim që të funksiononte si një hotel me 741 dhoma. Megjithatë, vetëm dy vjet më vonë projekti u braktis kur u zbulua se puna kishte vazhduar pa lejen e kërkuar të planifikimit dhe në një vend ku një zhvillim kaq i gjerë turistik nuk ishte miratuar. Zhvilluesi thuhet se i shteroi rezervat e tij financiare dhe e braktisi ishullin, duke lënë pas një godinë të madhe betoni.
Ndërtesa e papërfunduar shtrihet në një truall prej afërsisht 2,350 metrash katrorë dhe vlera e saj komerciale aktualisht vlerësohet në vetëm 48,000 euro. Sipas Daily Mail, ka afërsisht 900 pronarë të regjistruar të ndërtesës, shumë prej të cilëve janë të huaj, të cilët nuk do të marrin asnjë kompensim financiar për investimin e tyre.
Pesë vdekje dhe paralajmërime të përsëritura
“Hoteli Fantazmë” është lidhur me incidente serioze sigurie dhe pesë vdekje, gjë që ka rritur presionin për një zgjidhje përfundimtare. Midis viktimave është një vajzë 13-vjeçare që humbi jetën në dhjetor 2025 pasi hyri ilegalisht në ndërtesë me shoqet e saj dhe ra nga një kat i lartë. Incidente të tjera fatale përfshijnë rënie nga lartësi të mëdha dhe parashutizëm nga çatia, ndërsa herë pas here njerëzit kanë hyrë në hapësirë për të regjistruar video të rrezikshme.
Autoritetet kishin urdhëruar masa sigurie që në vitin 2016, duke përfshirë instalimin e një gardhi katër metra të lartë dhe tabelave paralajmëruese. Në vitin 2019, urdhri u përsërit, me një kërkesë shtesë për kamera sigurie dhe tabela në më shumë gjuhë. Pavarësisht masave, hyrjet e paligjshme vazhduan, me shkelësit që përballeshin me gjoba që tejkalonin 500 euro.
Shpronësim dhe prishje me forcë deri në vitin 2027
Sipas një njoftimi të botuar në Buletinin zyrtar (BOP), procedura e shpronësimit të detyrueshëm u miratua, me arsyetimin se “funksioni shoqëror i pronës” nuk ishte përmbushur, pasi ndërtesa mbetet e papërfunduar dhe pa lejet e nevojshme. Në të njëjtën kohë, u dha një afat njëmujor për paraqitjen e kundërshtimeve ose apelimeve.
Prishja është planifikuar për periudhën 2026–2027 dhe konsiderohet një operacion veçanërisht kompleks, për shkak të vendndodhjes së ndërtesës në një zonë të pjerrët bregdetare dhe pranisë së materialeve të rrezikshme, siç është azbesti.
Top Channel
