Rregulla të reja udhëtimi në Mbretërinë e Bashkuar, sfida për personat me shtetësi të dyfishtë, ja çfarë ndryshon 25/02 11:30
Irani ka reaguar ashpër ndaj fjalimit të presidentit amerikan Donald Trump për gjendjen e kombit, duke akuzuar administratën e tij për përdorim të propagandës naziste dhe “gënjeshtrave të mëdha” kundër Teheranit.
Zëdhënësi i Ministrisë së Jashtme iraniane, Esmaeil Baqaei, në një reagim në rrjetin social X, deklaroi se administrata amerikane po përsërit të pavërteta për programin bërthamor dhe raketor të Iranit, si dhe për numrin e viktimave gjatë protestave në vend.
Në reagimin e tij, Baqaei iu referua Joseph Goebbels, ministrit të propagandës së Gjermanisë naziste, duke thënë se: “Përsërite një gënjeshtër mjaftueshëm shpesh dhe ajo bëhet e vërtetë, ky është një ligj propagande i shpikur nga nazistët. Ky ligj tani po përdoret sistematikisht nga administrata amerikane.”
Ai akuzoi gjithashtu Izraelin, të cilin e cilësoi si “regjim gjenocidal”, se po bashkëpunon në një fushatë dezinformimi kundër Iranit.
Sipas tij, pretendimet e SHBA-së për programin bërthamor, raketat balistike dhe numrin e viktimave gjatë trazirave në Iran janë “thjesht përsëritje e gënjeshtrave të mëdha”.
Në fjalimin e tij, Trump deklaroi se SHBA po forcon praninë ushtarake rreth Iranit për të garantuar që vendi të mos pajiset me armë bërthamore. “Ata duan të bëjnë një marrëveshje, por ne nuk i kemi dëgjuar ato fjalë sekrete: ne kurrë nuk do të lejojmë që ata të kenë një armë bërthamore,” u shpreh presidenti amerikan.
Nga ana tjetër, ministri i Jashtëm iranian, Abbas Araghchi, deklaroi se Irani “në asnjë rrethanë nuk do të zhvillojë kurrë një armë bërthamore”. Ndërkohë, organizatat ndërkombëtare të të drejtave të njeriut kanë ngritur vazhdimisht shqetësime për përdorimin e dhunës nga autoritetet iraniane ndaj protestuesve, duke raportuar për mijëra të vrarë dhe të arrestuar gjatë demonstratave kundër shtypjes dhe krizës ekonomike.
Tensionet mes Shteteve të Bashkuara dhe Iranit mbeten të larta, ndërsa deklaratat e fundit tregojnë për një përplasje të fortë retorike mes dy vendeve.
Top Channel
